Investigimi i Sky News zbulon skemën e mafias shqiptare të kokainës në Britani: 280 paund në ditë për shpërndarësit, rekrutim brenda minutash dhe telefona që shiten për 300 mijë paund

Një investigim gati njëvjeçar i Sky News ka zbuluar mënyrën se si rrjetet kriminale shqiptare kontrollojnë një pjesë të konsiderueshme të tregut të kokainës në Britaninë e Madhe, duke rekrutuar shpërndarës përmes TikTok-ut, duke ofruar pagesa deri në 280 paund në ditë dhe duke organizuar shitjen e drogës përmes telefonave që arrijnë vlerën e qindra mijëra paundëve.

Gazetarët investigativë, të pajisur me identitete të rreme dhe kamera të fshehta, arritën të depërtojnë në këto rrjete, duke dokumentuar se sa lehtë mund të punësohet një person për shpërndarjen e kokainës.

Nga TikTok-u te shpërndarja e drogës brenda pak minutash

Investigimi nisi nga reklamat në TikTok, ku ofroheshin vende pune me pagesa të larta. Disa njoftime përdornin emoji të borës, si referencë për kokainën.

Në qytetin Exeter, një person i identifikuar si Leo u takua me gazetarin e infiltruar në një kafene. Brenda pak minutash, ai i ofroi strehim, i shpjegoi çmimet e kokainës dhe i propozoi të fillonte menjëherë punën.

Takimi nisi në orën 10:30, ndërsa Leo kërkoi që gazetari të niste shpërndarjen që në mesditë. Ai diskutoi hapur edhe për uljet e çmimeve për blerjet me shumicë dhe pretendoi se policia nuk përbënte problem.

Ish-oficeri britanik David McKelvey, i cili ka punuar në operacione të fshehta kundër grupeve kriminale shqiptare, u shpreh se informacionet e zbuluara gjatë takimit do të mjaftonin për të justifikuar një kontroll policor në adresën e përmendur.

280 paund në ditë dhe 300 mijë paund për një telefon droge

Në Wigan, një tjetër person i përfshirë në rrjet i ofroi gazetarit të infiltruar 280 paund në ditë për shpërndarjen e kokainës. Takimi u zhvillua në një automjet pranë një këndi lojërash për fëmijë.

Investigimi dokumentoi edhe sistemin e shpërndarjes përmes telefonave të posaçëm, të njohur si deal phones. Klientët porosisin drogën në këta numra, ndërsa shpërndarësit marrin adresat dhe realizojnë dorëzimet.

Në Royal Tunbridge Wells, një gazetar i Sky News porositi kokainë dhe brenda pak minutash mori konfirmimin se droga do t’i dorëzohej brenda 30 minutash.

Vlera e këtyre telefonave lidhet me rrjetin e klientëve që kanë krijuar. Një prej tyre ishte reklamuar në TikTok për 300 mijë paund.

2,500 paund për të nxjerrë nga Britania persona që i shmangen drejtësisë

Gazetarët zbuluan edhe reklama në gjuhën shqipe që ofronin transportimin drejt Europës të personave me probleme ligjore në Britani.

Një person i kontaktuar përmes një profili të fshehtë ofroi transport me kamion kundrejt 2,500 paundëve.

Frank Stewart, zyrtar i Agjencisë Kombëtare të Krimit (NCA), konfirmoi se disa grupe kriminale shqiptare janë të përfshira edhe në organizimin e emigracionit të paligjshëm.

Si morën kontrollin e tregut britanik grupet kriminale shqiptare?

Sipas investigimit, fuqizimi i grupeve shqiptare lidhet me kontaktet e drejtpërdrejta që krijuan me furnizuesit e kokainës në Amerikën e Jugut. Duke shmangur ndërmjetësit europianë, ato ulën kostot dhe rritën fitimet.

Zyrtari i NCA-së, Frank Stewart, deklaroi se autoritetet britanike vlerësojnë se grupet e organizuara kriminale shqiptare kanë kontrollin kryesor mbi importimin e kokainës në Britani.

Ndërkohë, ish-oficeri David McKelvey paralajmëroi se këto organizata mund të përdorin dhunë ekstreme ndaj personave që i kundërshtojnë ose nuk përmbushin detyrimet.

Sipas të dhënave të paraqitura në investigim, Britania është konsumatori më i madh i kokainës në Europë, ndërsa përdorimi i saj është rritur me mbi 25% gjatë pesë viteve të fundit.

Nga gomonia në fermën e kanabisit

Investigimi përfshin edhe dëshminë e një shqiptari që mbërriti me gomone në Britani në vitin 2022.

Ai tregoi se familjarët i kishin financuar udhëtimin, me kushtin që të punonte për trafikantët shqiptarë. Pas largimit nga hoteli ku ishte strehuar si emigrant, përfundoi në një fermë kanabisi në Manchester.

Sipas dëshmisë së tij, edhe shumë prej personave që udhëtuan me të kishin synime të ngjashme.

Megjithatë, Sky News thekson se këto raste nuk përfaqësojnë komunitetin shqiptar në Britani, shumica dërrmuese e të cilit nuk ka lidhje me krimin e organizuar.

Investigimi është realizuar nga gazetari Chris Matthews dhe ekipi i Sky News, në bashkëpunim me Full Story Films dhe Quicksilver Media.

Dokumentari “The Drug Lords Next Door” do të transmetohet më 13 nëntor, në orën 21:00, në Sky News dhe Sky Documentaries, duke ekspozuar përmes kamerave të fshehta mënyrën e funksionimit të rrjeteve kriminale shqiptare në tregun britanik të kokainës.