Vetëm 9 ditë në detyrë, drejtoresha e Burgjeve jep dorëheqjen me urdhër të Ramës

Vetëm nëntë ditë pas emërimit në krye të Drejtorisë së Përgjithshme të Burgjeve, Sadleva Bodo ka dorëzuar dorëheqjen, duke u bërë një nga drejtueset e para që largohen nga detyra në kuadër të urdhrit të kryeministrit Edi Rama për dorëheqjen e drejtuesve të institucioneve shtetërore.

Bodo është paraqitur mëngjesin e kësaj të premteje në Ministrinë e Drejtësisë, ku ka dorëzuar dorëheqjen në zbatim të kërkesës së kryeministrit, të përcjellë përmes ministrit të Drejtësisë, Toni Gogu.

Rasti i saj është ndër më të pazakontët e kësaj vale largimesh në administratën shtetërore, pasi Bodo ishte emëruar në këtë detyrë më 14 tetor, me vendim të Këshillit të Ministrave, duke zëvendësuar Adriatik Kupin, i cili kishte dhënë dorëheqjen pas rreth shtatë muajsh në detyrë.

Vetëm nëntë ditë më vonë, edhe pasardhëses së tij i është kërkuar të largohet, pa pasur ende kohën e nevojshme për të dëshmuar rezultatet e punës së saj në drejtimin e sistemit të burgjeve.

Dorëheqja vjen një ditë pas mbledhjes së zhvilluar rreth orës 15:00 në Ministrinë e Drejtësisë, ku ministri Toni Gogu u ka komunikuar drejtuesve të institucioneve në varësi kërkesën për largimin nga detyra.

Urdhri i Ramës përfshin drejtuesit e institucioneve në varësi të të gjitha ministrive, përfshirë Tatimet, Doganat, agjencitë shtetërore dhe kompanitë publike të sektorëve strategjikë.

Procesi i dorëheqjeve ka nisur që në orën 08:00 të mëngjesit të kësaj të premteje dhe parashikohet të përfundojë të hënën, më 26 tetor.

Largimi i Sadleva Bodos, vetëm nëntë ditë pas emërimit me vendim të qeverisë, nxjerr në pah një situatë të pazakontë në administratë, ku drejtuesve të sapoemëruar u kërkohet të dorëhiqen ende pa nisur.