Autoriteti Kombëtar i Ushqimit ka ushtruar kontrolle në supermarketet e Tiranës, ku në tre prej tyre gjeti shkelje të rënda.
Këto subjekte u konstatua importim produktesh në kundërshtim me ligjin, ushtrim aktiviteti i palicensuar, kushte të papërshtatshme higjieno-sanitare, mangësi në dokumentacion, tregtim jashtë afateve të përdorimit dhe etiketim produkti jokonform ligjit.
Bazuar në këto shkelje, AKU ka gjobitur subjektet në fjalë me 5.25 milion lekë, ndërsa ka hequr nga tregu orizin.
Ndërsa në Durrës, u bllokuan dy ngarkesa me produkte importi me origjinë nga Brazili.
Sasia prej 27 ton me fileto pule rezultoi me salmonelë, ndërsa 19.2 ton kokërr kafe e pabluar, kishte mangësi në dokumentacionin shoqërues.
Njoftimi i AKU
AKU NDALON HYRJEN E 46.2 TON PRODUKTE TË PASIGURTA NGA BRAZILI PËR NË TERRITORIN SHQIPTAR DHE NDËSHKON ME 5.25 MILION LEKË KUNDRAVAJTJET LIGJORE NË 3 SUPERMARKETE NË TIRANË
Drejtoria Rajonale e AKU Tiranë ushtroi kontroll në 3 subjekte me aktivitet “Supermarket”, nga ku u konstatua: importim i produkteve ushqimore në kundërshtim me ligjin, ushtrim aktiviteti i palicencuar, kushte të papërshtatshme higjeno-sanitare, mangësi në dokumentacion (gjurmueshmëri, plani HACCP), veprim në kundërshtim me përgjegjësitë e Operatorit të Biznesit, tregtim i produkteve me afat përdorimi të kaluar, si dhe etiketim i produkteve jokonform ligjit.
Në PIK Durrës u ushtrua kontroll në dy ngarkesa me produkte importi, të dyja me origjinë nga Brazili dhe destinacion Shqipërinë , nga ku rezultoi: 27 ton “Fileto pule” me ngarkesë mikrobiologjike (Salmonella app) dhe 19.2 ton “Kafe kokërr e papjekur” me mangësi në dokumentacionin shoqërues (certifikatë fitosanitare e palëshuar nga autoriteti zyrtar i vendit të origjinës).
Për shkeljet e konstatuara, trupa inspektuese mori masat administrative si në vijim: 9 masa administrative “Gjobë” me vlerën totale 5.25 milion lekë për 3 subjektet, “Tërheqja e menjëhershme e produktit nga tregu” me destinacion asgjësimin për produktin oriz të importuar në kundërshtim me ligjin, si dhe “Kthimi në vendin e origjinës” për 46.2 ton produkte importi të vlerësuar si të pasigurta për konsum human.
Siguria ushqimore është sfida jonë e përbashkët!
