Qeveria përdor sërish Policinë kundër protestës/ 20 qytetarë nën procedim pas tubimit, të tjerë merren me forcë këtë të hënë

Kur protesta nuk shuhet në shesh, presioni zhvendoset te protestuesit. Pas tubimit të 13 shtatorit kundër qeverisë, Policia e Tiranës ka proceduar penalisht 20 pjesëmarrës, ndërsa këtë të hënë të tjerë qytetarë që protestonin janë marrë me forcë nga efektivët dhe janë shoqëruar.

Është një skenar që po përsëritet në një moment kur protesta kundër qeverisë vijon prej më shumë se 100 ditësh: përplasje me uniformat blu, shoqërime, arrestime dhe më pas procedime penale ndaj qytetarëve që dalin në rrugë. Presioni policor po kthehet kështu në një tjetër mjet përballë një proteste që qeveria nuk ka arritur ta shuajë politikisht.

Vetëm një ditë pas tubimit të së dielës, Policia njoftoi nisjen e procedimit penal ndaj 20 protestuesve, të cilët i akuzon për bllokimin e disa prej akseve kryesore të Tiranës dhe prishjen e qetësisë publike.

“Tiranë/Bllokuan lëvizjen në akset kryesore të kryeqytetit dhe prishën qetësinë publike, procedohen penalisht 20 pjesëmarrës në një tubim të zhvilluar më datë 13.09.2026.

Në vijim të veprimeve hetimore dhe procedurale të kryera me qëllim dokumentimin e veprimeve të kundërligjshme të kryera gjatë këtij tubimi dhe nxjerrjen përpara përgjegjësisë penale të autorëve të tyre, specialistët e Komisariatit të Policisë Nr. 2 referuan materialet në Prokurori, ku nisi procedimi penal për 20 pjesëmarrës, konkretisht për shtetasit:

Sh. B., 33 vjeç; V. D., 29 vjeç; B. K., 36 vjeç; A. P., 49 vjeç; I. M., 28 vjeç; A. J., 39 vjeç; A. K., 46 vjeç; G. P., 37 vjeç; A. Ll., 28 vjeçe; I. M., 24 vjeçe; E. K., 27 vjeç; A. N., 26 vjeçe; S. E., 32 vjeç; A. Ll., 20 vjeçe; M. Y., 19 vjeç; A. B., 59 vjeçe; D. G., 50 vjeç; B. M., 34 vjeçe; R. Sh., 22 vjeç dhe A. K., 29 vjeçe.

Këta shtetas, dyshohet se nëpërmjet organizimit dhe pjesëmarrjes në tubim, kanë bllokuar lëvizjen e qytetarëve dhe të mjeteve, si dhe kanë prishur qetësinë publike, në akset kryesore të kryeqytetit, konkretisht bulevardet “Dëshmorët e Kombit”, “Bajram Curri” dhe “Gjergj Fishta”, në sheshin “Wilson” dhe në rrugët “Sami Frashëri” dhe “Abdyl Frashëri”.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme për veprat penale “Organizimi dhe pjesëmarrja në grumbullime dhe manifestime të paligjshme”, “Pengimi i qarkullimit të mjeteve të transportit” dhe “Prishja e qetësisë publike””, njoftoi Policia.

Por procedimet e së dielës nuk e mbyllën reagimin policor ndaj protestuesve. Edhe këtë të hënë, gjatë protestës së zhvilluar paradite, qytetarë të tjerë janë marrë nga efektivët.

Protesta është një e drejtë qytetare. Megjithatë, përballë një lëvizjeje që prej më shumë se 100 ditësh kërkon largimin e qeverisë, përgjigjja po shoqërohet vazhdimisht edhe me forcën e Policisë që është kthyer në vegël të qeverisë, shoqërime, arrestime dhe procedime.

Kur një protestë nuk mbyllet pas një nate, por rikthehet ditë pas dite, çështja nuk është më vetëm sa njerëz ndodhen në shesh. Çështja është nëse presioni penal dhe policor po përdoret për t’i bërë qytetarët të mendojnë dy herë përpara se të dalin sërish.

Dhe ja ku ndodhi përsëri: një ditë pas protestës, 20 qytetarë përfunduan nën procedim penal; të nesërmen, të tjerë u morën nga Policia. Protesta vazhdon, ndërsa bashkë me të vazhdon edhe presioni ndaj atyre që zgjedhin të dalin në rrugë.