Stuhia në Kosovë merr një jetë, disa të lënduar dhe dëme të mëdha në disa komuna

Stuhia e fuqishme që goditi Kosovën pasditen e së martës ka shkaktuar një viktimë, disa të lënduar dhe dëme të konsiderueshme materiale në disa komuna të vendit. Erërat e forta, reshjet e dendura dhe breshëri dëmtuan banesa, objekte publike dhe infrastrukturë, ndërsa autoritetet kanë nisur vlerësimin e pasojave.

Në Pozharan të Komunës së Vitisë, dy persona pësuan lëndime të lehta trupore pasi dyert hyrëse të oborrit të tyre u rrëzuan nga era e fortë. Po në këtë fshat, një person humbi jetën pasi u rrëzua aksidentalisht në ballkonin e banesës së tij, i cili ishte lagur si pasojë e stuhisë.

Në komunën e Vitisë, moti i keq shkaktoi dëmtime në çatitë e banesave dhe objekteve shkollore, ndërsa në disa zona u rrëzuan edhe pemë. Kryetari i komunës, Sokol Haliti, bëri të ditur se ka nisur procesi i vlerësimit të dëmeve dhe kërkoi mbështetje nga institucionet qendrore për familjet e prekura.

Gjendje e rënduar u raportua edhe në Suharekë, ku pamjet e publikuara nga qytetarët tregojnë erëra të fuqishme që rrëzuan çatitë e objekteve biznesore dhe shkollore. Përveç qytetit, dëme të mëdha u regjistruan edhe në disa fshatra të komunës. Kryetari Bali Muharremaj njoftoi se ekipet kanë nisur vlerësimin e dëmeve në terren.

Erëra të forta dhe breshër përfshinë edhe komunën e Pejës, ku si pasojë u krijuan bllokime në disa akse rrugore.

Instituti Hidrometeorologjik i Kosovës ka paralajmëruar se moti i paqëndrueshëm do të vijojë edhe gjatë së mërkurës. Sipas parashikimit, i gjithë territori i Kosovës pritet të përfshihet nga stuhi me bubullima, reshje intensive shiu, breshër dhe erëra të forta. Për këtë arsye është lëshuar niveli portokalli i rrezikut.

Autoritetet u kanë bërë thirrje qytetarëve të tregojnë kujdes gjatë qëndrimit në ambiente të hapura, ndërsa Ministria e Infrastrukturës u ka kërkuar drejtuesve të automjeteve të shmangin udhëtimet e panevojshme gjatë stuhive dhe të përshtatin shpejtësinë me kushtet atmosferike.