“Mos e përdor emrin e djalit tonë për propagandë”/ Prindërit e Martin Canit i përgjigjen Ramës: 18 muaj pa drejtësi është turp institucional

Prindërit e Martin Canit kanë reaguar ashpër ndaj deklaratave të kryeministrit Edi Rama, i cili gjatë prezantimit të projektit “Smart City” në 20 shkolla iu referua vrasjes së 14-vjeçarit, duke e cilësuar projektin si “përgjigjen” e qeverisë ndaj asaj tragjedie.

Në një deklaratë publike, familja Cani e akuzon kreun e qeverisë se po vazhdon të përdorë emrin e djalit të tyre për propagandë politike, ndërsa sipas tyre shmang përgjegjësinë e institucioneve që dështuan ta mbronin.

Prindërit kundërshtojnë edhe deklaratat e Ramës se qeveria ka reaguar ndaj tragjedisë, duke theksuar se fëmijët vazhdojnë të humbin jetën dhe se problemet që çuan në vrasjen e Martinit mbeten të pazgjidhura.

Sipas familjes, mbyllja e TikTok, e cila u paraqit nga qeveria si një masë pas vrasjes së Martinit, nuk ka parandaluar ngjarje të tjera tragjike, duke përmendur vrasjen e një të mituri në Maliq dhe një tjetër në Durrës. Ata theksojnë se rrjetet sociale nuk janë shkaku i dhunës, por dështimi i sistemit arsimor, mungesa e sigurisë në shkolla dhe papërgjegjshmëria institucionale.

Familja kritikon edhe projektin për vendosjen e kamerave në shkolla, duke theksuar se kamerat nuk parandalojnë dhunën, nuk zëvendësojnë psikologët, nuk garantojnë siguri dhe nuk do të shpëtojnë jetë pa masa konkrete.

Një pjesë e rëndësishme e reagimit i kushtohet edhe sistemit shëndetësor. Prindërit pyesin pse nuk është blerë pajisja zemër mushkëri që, sipas tyre, do të kishte mundur të shpëtonte jetën e Martinit, duke kujtuar se në Spitalin e Traumës mungonte si kardiokirurgu, ashtu edhe pajisja e nevojshme për ndërhyrje në raste të plagosjeve në zemër.

Ata shprehen gjithashtu se, nëse kryeministri mendon vërtet çdo ditë për Martinin, siç deklaroi publikisht, atëherë duhej të kishte takuar familjen, të kishte ofruar mbështetje institucionale dhe të kishte kërkuar falje për dështimet e sistemit.

Në deklaratë përmendet edhe episodi në Kuvend, ku sipas familjes, ministrja Ogerta Manastirliu dhe ministrja Belinda Balluku qeshën kur u përmend emri i Martinit, ndërsa Rama, sipas tyre, nuk reagoi dhe nuk mbajti asnjë qëndrim publik.

Familja ngre akuza edhe ndaj Policisë së Shtetit, duke pretenduar se arma e krimit nuk u gjet nga efektivët, por nga një qytetar i rastësishëm, çka sipas saj tregon dështim në administrimin e provave dhe hetimin e ngjarjes.

Në fund të reagimit, prindërit i bëjnë thirrje kryeministrit të kërkojë përfundimin urgjent të hetimeve mbi përgjegjësinë e shkollës “Fan Noli” dhe të sistemit shëndetësor, duke e cilësuar “turp institucional” faktin që, sipas tyre, pas 18 muajsh ende nuk ka përgjigje.

“Martini nuk ishte slogan politik. Martini nuk ishte pretekst për censurë. Martini nuk ishte justifikim për kamera. Martini ishte një fëmijë i mirë, një futbollist me ëndrra, një djalë që meritonte të jetonte”, thuhet në mbyllje të deklaratës, ku familja kërkon drejtësi për Martinin, siguri për fëmijët e Shqipërisë, përgjegjësi nga institucionet dhe veprime konkrete, jo fjalë.

Deklarata e plotë:

Familja Cani shpreh indinjatën e saj të thellë për mënyrën se si Kryeministri Rama vazhdon të përdorë emrin e djalit tonë, Martin Cani, për qëllime politike dhe propagandistike, duke shmangur përgjegjësitë reale të institucioneve që dështuan ta mbronin.

Edhe sot, në fjalimin e tij publik, Kryeministri deklaroi se: “Prindërit duhet të ndihen të lehtësuar… qeveria është ndryshe nga si përshkruhet në kanalet sociale.” Por ndërkohë, realiteti është krejt tjetër: fëmijët vazhdojnë të vriten, institucionet vazhdojnë të dështojnë dhe tragjeditë nuk po ndalen.

1. Vrasjet e miturve nuk ndaluan pas mbylljes së TikTok

Pavarësisht mbylljes së TikTok, të cilën qeveria e përdori si justifikim politik pas vrasjes së Martinit, realiteti është i qartë:

• Një i mitur u vra në Maliq.
• Një tjetër i mitur u vra në Durrës.

Këto tragjedi tregojnë se rrjetet sociale nuk janë shkaku i vrasjeve, por dështimi i sistemit arsimor, mungesa e sigurisë në shkolla dhe papërgjegjshmëria institucionale.

2. Vendosja e kamerave nuk zgjidh problemin

Kryeministri foli sot për “smart city në shkolla” dhe për vendosjen e kamerave, duke thënë se: “Algoritmi është një trup që bën atë që thotë.”

Por kamerat:

• nuk parandalojnë dhunën,
• nuk zëvendësojnë psikologët,
• nuk zgjidhin mungesën e sigurisë,
• nuk e shpëtuan Martinin, dhe nuk do të shpëtojnë fëmijë të tjerë pa masa reale.

Siguria në shkolla kërkon veprime, jo pajisje teknologjike për propagandë.

3. Kryeministri thotë se “mendon vazhdimisht për Martinin”, por nuk ka bërë asgjë për familjen tonë

Nëse Kryeministri mendon vërtet për Martinin:

• Pse nuk ka takuar asnjëherë familjen tonë?
• Pse nuk ka ofruar asnjë mbështetje institucionale?
• Pse nuk ka kërkuar falje për dështimet e sistemit që ai drejton?

Fjalët nuk mjaftojnë. Ne kemi parë vetëm heshtje, shmangie dhe përdorim politik të tragjedisë sonë.

4. Pse nuk është blerë pajisja e zemrës që do ta shpëtonte Martinin?

Martini vdiq sepse:

• Spitali i Traumës nuk kishte kardiokirurg;
• Spitali i Traumës nuk kishte pajisjen zemër-mushkëri, që riparon zemrën e të plagosurve në zemër.

Kjo pajisje kushton më pak se një makinë qeveritare, por ende nuk është blerë.

Sa fëmijë të tjerë duhet të vdesin që qeveria të kuptojë se pajisjet shpëtojnë jetë, jo kamerat?

5. Pse Kryeministri nuk kritikoi ministrat që qeshën kur u përmend Martini në Parlament?

Kur u përmend emri i Martinit në Kuvend:

• Ministrja Manastirliu qeshi;
• Ministrja Balluku qeshi.

Kryeministri nuk tha asnjë fjalë. Asnjë distancim. Asnjë ndëshkim. Asnjë ndjesë.

A është ky respekti që ai pretendon se ka për djalin tonë?

6. Policia nuk bëri detyrën – arma e krimit u gjet nga një kalimtar i rastësishëm

Nëse policia do të kishte vepruar siç duhet:

• Arma e krimit nuk do të gjendej nga një qytetar i rastësishëm;
• Provat nuk do të rrezikonin të humbnin;
• Hetimi nuk do të ishte i cunguar.

Kjo është dëshmi e qartë e dështimit të strukturave të rendit.

7. Kryeministri duhet të kërkojë mbylljen urgjente të hetimit 18-mujor për shkollën Fan Noli dhe sistemin shëndetësor

Në vend që të politizojë tragjedinë e Martinit:

• Kryeministri duhet të kërkojë mbylljen urgjente të hetimit për përgjegjësinë e shkollës Fan Noli, e cila nuk njoftoi prindërit për incidentin e të premtes;
• Duhet të kërkojë mbylljen urgjente të hetimit për dështimin spektakolar të sistemit shëndetësor, që e dërgoi Martinin në spitalin e gabuar dhe nuk kishte pajisjet për ta shpëtuar.

18 muaj hetim pa përgjigje është turp institucional.

Ne nuk do të heshtim

Martini nuk ishte slogan politik. Martini nuk ishte pretekst për censurë. Martini nuk ishte justifikim për kamera.

Martini ishte një fëmijë i mirë, një futbollist me ëndrra, një djalë që meritonte të jetonte.

Ne kërkojmë:

• Drejtësi për Martinin
• Siguri për fëmijët e Shqipërisë
• Përgjegjësi nga institucionet
• Veprime, jo fjalë

Familja Cani Tiranë, 17.07.2026