Gjykata e Vlorës ka lënë në burg dy rojet private të kompanisë “Major Security”, Artur Grami dhe Gazmend Vathi, të cilët akuzohen për dhunën e ushtruar ndaj protestuesve në Zvërnec.
Vendimi vjen pas përplasjeve të forta që u regjistruan gjatë protestës kundër projektit turistik pranë lagunës së Nartës, ku pamjet e publikuara në media shkaktuan reagim të madh publik.
Dy punonjësit e sigurisë dolën para gjykatës për vlerësimin e masës së sigurisë, ndërsa trupa gjykuese vendosi ndaj tyre “arrest me burg”. Ata dyshohet se janë përfshirë në dhunën ndaj qytetarëve që protestonin kundër punimeve në zonën e Zvërnecit.
Më herët, e njëjta masë sigurie është dhënë edhe për Geraldo Bibën, një tjetër punonjës i “Major Security”, i akuzuar për dhunimin e një protestuesi gjatë të njëjtës protestë.
Ngjarja në Zvërnec u kthye në një nga episodet më të rënda të përplasjes mes qytetarëve dhe sigurisë private. Banorë të zonës, aktivistë mjedisorë dhe përfaqësues të shoqërisë civile dolën në protestë për të kundërshtuar një projekt turistik që, sipas tyre, rrezikon ekosistemin pranë lagunës së Nartës dhe cenon një zonë me rëndësi të veçantë natyrore.
Tensionet u përshkallëzuan kur rojet private të kontraktuara për sigurinë e kantierit u përplasën me protestuesit. Në pamjet që qarkulluan publikisht, u panë persona të maskuar duke përdorur spraj me piper dhe dhunë fizike ndaj qytetarëve.
Momenti më i rëndë ishte ai kur një protestues u tërhoq zvarrë nga rojet private, pamje që sollën reagime të shumta dhe ngritën pikëpyetje serioze mbi rolin e sigurisë private dhe ndërhyrjen e institucioneve në terren.
Gjatë përplasjeve, një grua raportohet se humbi ndjenjat, ndërsa situata nxori edhe një herë në pah tensionin e madh që ka shoqëruar projektin në Zvërnec.
Pas publikimit të pamjeve dhe presionit publik, autoritetet nisën hetimet për punonjësit e sigurisë private të përfshirë në incident. Me vendimin e fundit të Gjykatës së Vlorës, tre punonjës të kompanisë “Major Security” ndodhen tashmë në burg për dhunën e ushtruar ndaj protestuesve në Zvërnec.
