Prokuroria e Durrësit ka firmosur 33 urdhër arreste për zyrtarë dhe biznesmenë të përfshirë në skandalin e kontrabandës së 102 kontenierëve me mbetje të rrezikshme të kompanisë Kurum, por jashtë dosjes hetimore ka mbetur ish ministrja e Turizmit dhe Mjedisit, Mirela Kumbaro, e cila ka firmosur lejen për transportin dhe eksportimin e këtyre mbetjeve. Dokumentet zyrtare tregojnë se vendimi është dhënë në prill 2022, duke e bërë atë subjekt të drejtpërdrejtë përgjegjësie penale. Megjithatë hetimi është kufizuar te vartësit dhe zbatuesit, pa u kaluar për kompetencë në SPAK, çka ka shtuar dyshimet për paprekshmëri politike dhe standarde të dyfishta në ndjekjen penale të aferave mjedisore.
Sipas vendimeve të shpallura, Prokuroria e Durrësit ka lëshuar 33 urdhër arreste për skemën e kontrabandës së 102 kontenierëve me mbetje të rrezikshme, të kapura gati për dalje nga Porti i Durrësit me destinacion Tajlandën. Mes të arrestuarve janë pronarët e kompanisë Sokolaj sh.p.k., doganierë dhe ish drejtoresha e Agjencisë Kombëtare të Mjedisit, Arta Dollani, e akuzuar për shkelje të ligjit në trajtimin e mbetjeve.
Ndërkohë jashtë hetimit ka mbetur Mirela Kumbaro, edhe pse ajo ka nxjerrë dhe firmosur aktin që pajiste kompaninë Sokolaj sh.p.k. me leje për eksport dhe transport të mbetjeve të rrezikshme. Dokumenti që publikohet është Akt Miratimi nr. 3732, datë 22 prill 2022, i firmosur nga Kumbaro, për pajisjen e kësaj kompanie me Licencë Mjedisore, Kategoria III.2.B. Mbështetur në këtë provë shkresore, Prokuroria kishte dhe ka detyrim ligjor ta përfshijë ish ministren në dosjen hetimore, pasi ajo rezulton se ka dhënë lejen për kontrabandimin e mbetjeve të rrezikshme të Kurum. Duhet gjithashtu të hetohet nëse leja është dhënë në mënyrë të paligjshme, nëse nuk është regjistruar apo arkivuar si akt zyrtar, ose nëse është zhdukur pas shpërthimit të skandalit dhe është gjetur vetëm në dosjet e kompanisë Sokolaj sh.p.k.
Është cilësuar absurde që Kumbaro nuk është regjistruar as si subjekt hetimi, ndërkohë që vartësja e saj, Arta Dollani, është marrë e pandehur me masë arrest në shtëpi si zbatuese e lejes së dhënë nga ish ministrja. Në këto kushte, Prokuroria e Durrësit, në zbatim të Kodit të Procedurës Penale, duhej t’ia kalonte çështjen SPAK për kompetencë hetimi, por nuk e ka bërë dhe as e ka regjistruar Kumbaron si subjekt hetimi.
Përtej këtij rasti, emri i Mirela Kumbaros ka dalë i përfshirë në një sërë aferash që lidhen me kulturën, mjedisin dhe turizmin, nga viti 2013 deri në vitin 2025, gjatë kohës që ajo ka mbajtur poste ministrore. Sipas raporteve të KLSH të dërguara në Prokurori dhe në SPAK, vendimet e saj për toka bregdetare, pyje, parqe, lumenj dhe burime ujore në zona të mbrojtura, si edhe për leje HECesh dhe guroresh, i kanë shkaktuar rreth 2 miliardë euro dëme pasurive kombëtare.
Emri i saj është përmendur edhe si bashkëpunëtore me ish ministrin Ilir Beqaj në vjedhjen e fondeve të ministrisë dhe donacioneve të Bashkimit Europian përmes tenderëve dhe faturave fiktive, si edhe në dhënien e tokave në zonën e Butrintit për resorte, përfshirë dhënien e qendrës së Butrintit për ndërtim hotelesh dhe aktivitetesh tregtare. Po ashtu ajo është lidhur me leje ndërtimi dhe shfrytëzimi në Kala të mbrojtura, si Lëkurësi në Sarandë dhe Kalaja e Gjirokastrës, si edhe me zhdukjen e 138 veprave arti dhe historie nga institucionet kombëtare, të nxjerra me urdhër për restaurime apo ekspozita dhe të pakthyera më.
Pavarësisht këtyre fakteve dhe dokumenteve zyrtare, Prokuroria e Juridiksionit të Përgjithshëm dhe SPAK nuk e kanë marrë asnjëherë në pyetje Mirela Kumbaron, ashtu siç ndodhi edhe në rastin e lejes për kontrabandën e mbetjeve të rrezikshme, duke forcuar perceptimin e një mburoje politike rreth saj dhe lidhjeve të saj me kryeministrin Edi Rama.
