SPAK ka kërkuar dënimin me 32 vite burg për Leonard Dukën, i akuzuar si drejtues i një grupi kriminal dhe përgjegjës për vrasjen e ish-policit Santiago Malko, ngjarje e ndodhur në vitin 2018 në Tiranë.
Gjatë seancës gjyqësore, Leonard Duka deklaroi se është i pafajshëm, duke pohuar se ndaj tij nuk ekziston asnjë provë konkrete dhe se procesi penal është i montuar për ta dëmtuar. “Kam besim te drejtësia,” u shpreh ai para trupit gjykues.
Nëna e viktimës, në dëshminë e saj në gjykatë, e cilësoi Leonard Dukën përgjegjës për vrasjen e djalit të saj dhe kërkoi dënimin maksimal për të pandehurin. Ajo deklaroi se nuk kërkon burgim të përjetshëm, por dënim me vdekje.
Sipas hetimeve, Santiago Malko u ekzekutua nga klani kriminal Duka, pas dështimit të një atentati të mëparshëm ndaj Ervis Martinaj, i cili rezulton i zhdukur pa gjurmë. Hetimet tregojnë se përplasja mes Martinajt dhe Dukës kishte lidhje me aktivitetet e lojërave të fatit.
Në këtë kontekst, Malko dyshohet se kishte marrë peng dhe dhunuar babanë e Leonard dhe Erlis Dukës, çka sipas prokurorisë thelloi konfliktin mes palëve dhe u pasua nga një seri ngjarjesh të rënda kriminale, që kulmuan me vrasjen e tij.
