Katër ndeshje, 2 fitore, 2 barazime, 8 pikë për vendin e parë në grupin A të eleminatoreve drejt “Euro2020”
Gjithcka ndodhi në stadiumin “Fadil Vokrri” në Prishtinë, ku Republika Çeke, shënoi e para por nuk mundi ta ruante rezultatin.
Jankto shërbeu për Schick që zhbllokoi rezultatin në 16’ për miqtë, por vendasit nuk qëndruan duarkryq.
Megjithëse pa Rashicën dhe pa Zenelin por me dëshirën e një grupi lojtarësh të etur për sukses, verdheblutë barazuan 4’ pas disavantazhit.
Vedat Muriqi gjeti golin e barazimit, 5’ pasi u ndëshkua me kartonin e verdhë.
Në pjesën e dytë ishin sërish vendasit më të qartë dhe për këtë u shpërblyen me golin e Vojvodës.
Ai shfrytëzoi topin e Berishës nga këndi dhe skema funksionoi, Kosova kaloi në avantazh.
Miqtë kryen 3 zëvendësime por rezultati nuk ndryshoi edhe pas 5’ shtesë nga kryesori holandez Makkelie.
Kosova do të luajë ndeshjen e 5-të në grup, ndaj Anglisë, të martën e ardhshme në orën 20:45.
