Ish zv.kryeministri Arben Ahmetaj ka dalë sërish me akuza të rënda dhe tronditëse ndaj kryeministrit Edi Rama, SPAK-ut dhe gjithë qeverisë, duke deklaruar se skandalet e zbardhura deri tani janë vetëm një copëz e vogël e një mekanizmi shumë më të madh kriminal. Në intervistën e tij të katërt për emisionin “Çim Peka Live”, Ahmetaj tha hapur se historia e 324 apartamenteve të Belinda Ballukut, dosja e AKSHI-t dhe aferat e tjera të bëra publike janë vetëm maja e ajsbergut të plaçkitjes dhe abuzimit me shtetin.
Në dialogun me gazetarin Çim Peka, Ahmetaj u ndal fillimisht te ndjekja penale ndaj tij, duke e përshkruar si një hakmarrje personale dhe politike. Ai mohoi kategorikisht se ka një kërkesë të re për ekstradimin e tij, duke theksuar se gjithçka ekziston vetëm “në mendjen dhe zemrën e kreut të organizatës kriminale dhe të Altin Dumanit”.
Sipas tij, dy kërkesa për ekstradim janë bërë më herët, njëra urgjente në gusht 2023 dhe një tjetër përmes asistencës juridike ndërkombëtare, ku autoritetet, siç tha ai, kanë kërkuar gjithçka: prona, llogari bankare, kriptomonedha, madje kanë shkuar deri te hetimi i fëmijëve të tij në Londër. “Kanë investiguar kalamajt e mi”, deklaroi Ahmetaj, duke e quajtur këtë një akt të paprecedentë dhe çnjerëzor.
Ai akuzoi drejtpërdrejt GJKKO-n për vendime selektive, duke thënë se gjykata i ka mohuar familjes së tij edhe të drejtën minimale për jetesë, ndërsa pronat e tij, të krijuara shumë përpara se ai të bëhej ministër, vijojnë të mbahen të sekuestruara. Në të njëjtën kohë, Ahmetaj ngriti pyetjen se si është e mundur që pasuritë e Erion Veliajt, sipas tij me vlera miliona euro, të lirohen, ndërsa ndaj tij zbatohet një standard tjetër.
“Dosja ime nuk ka shkuar ende në gjykatë”, tha Ahmetaj, duke shtuar se SPAK nuk arrin dot të ndërtojë një akuzë të qëndrueshme për korrupsion dhe pastrim parash. Ai theksoi se nuk ka pasur asnjë rol institucional në dhënien e koncesioneve të inceneratorëve dhe se nuk ka qenë autoritet kontraktor në asnjë fazë të atyre proceseve.
Me tone të ashpra, Ahmetaj u ndal edhe te çështja e një tenderi të OSHEE-së, të cilin e cilësoi si një shembull flagrant të sajesave. Sipas tij, në dosje janë futur lidhje absurde mes tenderëve publikë dhe aseteve private, përfshirë vilën në Lalëz, për të cilën ai tha se ekzistojnë dokumente zyrtare që provojnë se nuk është paguar asnjë cent dhe se nuk ka pasur kurrë pronësi reale.
Ish zv-kryeministri akuzoi hapur kreun e SPAK-ut, Altin Dumani, duke thënë se çështja ndaj tij është personale dhe përbën një goditje të drejtpërdrejtë ndaj demokracisë, prezumimit të pafajësisë dhe barrës së provës. Ai ngriti një sfidë publike, duke kërkuar që të hetohet pasuria e çdo ministri dhe ish ministri, njësoj siç, sipas tij, është hetuar jeta e tij deri në vitin 2004.
“324 apartamentet e Ballukut janë vetëm maja e ajsbergut. AKSHI po ashtu. Ajo që po del sot është vetëm sipërfaqja”, deklaroi Ahmetaj, duke paralajmëruar se pas kësaj fasade fshihet një sistem shumë më i thellë grabitjeje dhe abuzimi me pushtetin.
Në fund, Ahmetaj theksoi se pasuria e tij pas marrjes së posteve ministrore është reduktuar dhe se çdo shtim në vlerë lidhet vetëm me rivlerësimin e pronave, një praktikë e zakonshme për të gjithë qytetarët. Ai e mbylli intervistën me një apel të drejtpërdrejtë për drejtësi të barabartë, duke paralajmëruar se ajo që po ndodh sot nuk është thjesht një betejë personale, por një provë për vetë shtetin e së drejtës në Shqipëri.
