Ish-oficeri i RENEA-s, Arbër Paplekaj, është liruar nga burgu pas vendimit të Apelit me Juridiksion të Përgjithshëm në Tiranë, i cili ndryshoi dënimin e dhënë më herët nga Gjykata e Elbasanit për vrasjen e biznesmenit Pjerin Xhuvani, i njohur si “PIPI”.
Paplekaj ishte arrestuar për vrasjen e Pjerin Xhuvanit gjatë një shkëmbimi zjarri në Elbasan. Në shkallë të parë, më 22 korrik 2023, Gjykata e Elbasanit e dënoi me 22 vite burg për akuzën e “vrasjes në rrethana cilësuese”. Pas kërkesës për rihapjen e procesit, Apeli ndryshoi vendimin, duke e dënuar përfundimisht me 7 vite heqje lirie, duke i ulur 15 vite nga dënimi fillestar.
Po ashtu, Gjykata e Apelit ndryshoi edhe kualifikimin juridik të veprës penale, nga “vrasje në rrethana cilësuese” në “vrasje në kushtet e tronditjes psikike”.
Në të njëjtin vendim, Apeli shpalli të pafajshëm edhe gjashtë efektivë të forcave “Shqiponja”, Dedion Duraku, Pëllumb Biçaku, Erion Balla, Erion Meçja, Donald Dedja dhe Besmir Kadiu. Për ta, Gjykata e Elbasanit kishte dhënë më parë dënim me 16 muaj shërbim prove.
Të pafajshëm u shpallën gjithashtu edhe dy ish-zëvendësdrejtorët e Policisë së Elbasanit, Albert Nushi dhe Nikollaq Palla, të cilët në shkallë të parë ishin dënuar me nga një vit shërbim prove secili.
Ngjarja e rëndë ndodhi gjatë një shkëmbimi zjarri, ku mbeti i vrarë Pjerin Xhuvani, ndërsa u plagosën Emiljani Prenga, Paulin Vuksani, dhëndri i Xhuvanit Edjon Budani, si edhe efektivja e policisë Xhensila Sota.
Pas ngjarjes, Arbër Paplekaj pranoi autorësinë e vrasjes dhe u vetëdorëzua në Repartin e Forcave RENEA në Tiranë. Ai deklaroi se kishte qëlluar në kushtet e vetëmbrojtjes, duke pretenduar se ishte qëlluar më parë nga persona që, sipas tij, po blinin vota.
