Gjykata e Vlorës ka dënuar me burgim të përjetshëm, Ritvan Zykajn, autorin e masakrës së Selenicës, shkruan “Shqiptarja.com”.
Kujtojmë këtu se më 10 gusht të 2018-ës, Zykaj vrau me kallashnikov 8 anëtarë të fisit të tij, midis tyre edhe dy të mitur.
Viktimat janë Demir Zykaj 76 vjeç, Perri Zykaj 76-vjeç, Besim Zykaj 45-vjeç (i biri), Vasilika Zykaj 40 vjeç (bashkëshorte e Besimit), Sara Zykaj 17 vjeçe (vajza e Besimit) Ledion Zykaj 6 vjeç (djali i Besimit), Azem Zykaj 49 vjeç (i biri), Afërdita Zykaj 47- vjeç (bashkëshorte e Azemit).
Më pas ai u arratis dhe u arrestua nga policia vetëm në orët e para të mëngjesit të 11 gushtit të 2018-ës.
Gjatë seancave gjyqësore, ai ka qenë i braktisur nga të gjithë, përveç njërës, ku ishte i pranishëm gjyshi i tij, i cili kërkoi që nipi të marrë dënimin që meriton.
Ndërkohë nga dëshmitë që kanë marrë hetuesit, rezulton se Ritvan Zykaj u akuzua nga të afërmit e tij, se u kishte vjedhur pulat, gjatë një dreke.
I fyer nga fjalët, i riu është çuar nga tavolina dhe më pas është rikthyer pas 30 minutash me kallashnikov në dorë, duke vrarë të 8 të afërmit e tij.
I pandehuri ka shprehur pendim të thellë për veprimin që ka bërë, ndërsa nga analizat mjekësore rezulton se ai nuk vuan nga problemet mendore dhe ka qenë i vetëdijshëm, në momentin e krimit.
