Pas më shumë se një dekade mungesë, Papa Leoni XIV do të rikthejë këtë fundjavë një traditë të lashtë papnore, duke kaluar pushimet verore në Castel Gandolfo – një qytet piktoresk buzë liqenit Albano, rreth një orë në jug të Romës. Vizita e tij, që do të zgjasë nga 6 deri më 20 korrik, shënon rikthimin e një zakoni shekullor, të ndërprerë prej 12 vitesh.
Castel Gandolfo, me vetëm 8,900 banorë, ka qenë tradicionalisht vendpushimi i Papëve, që nga viti 1596, kur Vatikani u bë pronar i pallatit papnor dhe kopshteve të tij madhështore në stil renesans. Por Papa Françesku, për të shmangur privilegjet dhe protokollet, kishte preferuar të qëndronte në Vatikan edhe gjatë verës.
Kthimi i Papës Leoni XIV ka ngjallur entuziazëm të madh mes banorëve dhe bizneseve lokale, të cilët shpresojnë në një rritje të vizitorëve dhe gjallërim të jetës ekonomike. “Papa Leo na ka dhënë një dhuratë të mrekullueshme,” tha Stefano Carosi, pronar i një kafeneje në sheshin kryesor të qytetit. “Papa gjithmonë ka qenë i rëndësishëm këtu… sepse tërheq njerëz.”
Edhe kryebashkiaku Alberto De Angelis është shprehur pozitivisht për këtë vizitë: “Prania e Papëve në Castel Gandolfo gjithmonë ka sjellë shumë aktivitet dhe rritje ekonomike.”
Për qytetin që ka pritur figura të rëndësishme të historisë së Kishës Katolike, rikthimi i kreut të ri të Vatikanit është jo vetëm simbolik, por edhe një mundësi e re për rilindje kulturore dhe turistike.
