Vetëm pak ditë pas miratimit të Kodit të ri Rrugor nga Parlamenti grek me shumicë votash, autoritetet kanë nisur zbatimin e tij me rigorozitet.
Qëllimi kryesor i këtij rishikimi ligjor është përmirësimi i sigurisë rrugore dhe ulja e aksidenteve fatale, përmes masave ndëshkuese më të ashpra për shkelësit, veçanërisht për ata që përsërisin shkeljet.
Ndryshimet më të theksuara përfshijnë përdorimin e telefonit gjatë drejtimit të automjetit, që tashmë konsiderohet një nga shkeljet më serioze. Për shkeljen e parë parashikohet një gjobë prej 350 eurosh dhe pezullim i lejes së drejtimit për 30 ditë; shkelja e dytë sjell një gjobë prej 1000 eurosh dhe pezullim për 180 ditë; ndërsa e treta shkon deri në 2000 euro dhe heqje patente për një vit. Përdorimi i telefonit ishte shkaku i tretë më i zakonshëm i aksidenteve në Greqi gjatë vitit 2024.
Një tjetër pikë kyçe e kodit është ndëshkimi për drejtimin e automjetit në gjendje të dehur, një faktor që kontribuoi në rreth 25% të vdekjeve në rrugët greke gjatë vitit të kaluar.
Ligji i ri përkufizon tre nivele të dehjes, me dënime që variojnë nga gjoba 350 euro dhe pezullim 30-ditor i patentës, deri në 4000 euro gjobë dhe heqje patente për një dekadë. Në rastet ku drejtimi në gjendje të dehur rezulton në vdekje ose dëmtime të rënda, parashikohen edhe ndjekje penale.
Gjoba të larta janë parashikuar edhe për mosvendosjen e rripit të sigurimit – 350 euro për shoferin dhe 150 euro për pasagjerët. Në rast përsëritjeje, ndëshkimi rritet deri në 2000 euro dhe pezullim të patentës për një vit.
Kodi i ri rrugor forcon gjithashtu ndëshkimet për një sërë shkeljesh të tjera, si: kalimi me semafor të kuq, mospërfillja e tabelës STOP, drejtimi pa leje drejtimi, parkimi në vendkalimet e përshtatura për persona me aftësi të kufizuara, si dhe tejkalimi i kufirit të shpejtësisë në zonat urbane.
Sipas të dhënave të Autoritetit Statistik Kombëtar, vetëm në vitin 2024 humbën jetën 665 persona në aksidente rrugore, duke e mbajtur Greqinë ndër vendet me nivelin më të lartë të vdekjeve nga trafiku në Bashkimin Evropian.
Të dhënat e Këshillit Evropian për Sigurinë në Transport e rendisin Greqinë të shtatën në Europë për fatalitetet rrugore.
