Kuvendi i Kosovës do të tentojë sot për herë të 13-të të konstituohet, në një proces që po zvarritet prej më shumë se tre javësh.
Seanca është parashikuar të nisë në orën 10:00, ndërsa që nga mbledhja e parë më 15 prill, përpjekjet për ngritjen e legjislaturës së nëntë kanë hasur në pengesa të shumta.
Në seancën e fundit morën pjesë 113 deputetë. Kryesuesi Avni Dehari propozoi që votimi të bëhej në mënyrë të fshehtë, një propozim që u kundërshtua nga partitë opozitare, të cilat theksuan se kjo bie ndesh me rregulloren e Kuvendit.
As në tentativën e 12-të partitë opozitare nuk paraqitën kandidatë për kryetar të Kuvendit. PDK, LDK, AAK dhe Lista Serbe zgjodhën të mos propozojnë asnjë emër.
Ndërkohë, 56 deputetë votuan pro votimit të fshehtë, një ishte kundër dhe nuk pati asnjë abstenim.
Ngërçi që ka bllokuar procesin vjen si pasojë e mungesës së konsensusit rreth kandidaturës së Albulena Haxhiut nga LVV për kryetare të Kuvendit.
Ajo kundërshtohet nga disa parti që e konsiderojnë si figurë përçarëse, ndërsa partia fituese vijon të këmbëngulë se Haxhiu është alternativa më e përshtatshme për këtë post.
