Kardinalët e mbledhur në konklavën sekrete në Vatikan rikthehen sot në mëngjes në Kapelën Sistine për të vijuar me raundet e votimit që do të çojnë në zgjedhjen e Papës së ri.
Dita e parë përfundoi pa një rezultat përfundimtar, çka u sinjalizua nga tymi i zi që u ngrit nga oxhaku i Kapelës Sistine, shenjë e qartë se nuk është arritur ende një marrëveshje.
Sot janë planifikuar katër votime: dy në mëngjes dhe dy të tjera pasdite. I pari nis rreth orës 10:30 dhe i dyti në vijim rreth orës 12:00.
Pas një ndërprerjeje për drekë, procesi rifillon me dy votime të tjera, të parashikuara për në orën 17:30 dhe 19:00.
Tymi nuk del pas çdo votimi, por vetëm pas përfundimit të dy votimeve të njëpasnjëshme në mëngjes dhe pasdite. Tymi i bardhë do të shënojë vetëm momentin kur një Papë i ri të jetë zgjedhur. Deri atëherë, sytë e botës mbeten drejt Vatikanit.
