Katër ditë dhimbje, ankth dhe shpresë.
Familjarët e Ardit Beshirit vijojnë të kërkojnë me duar dhe lopata trupin e 29-vjeçarit, që u zhduk nën një rrëshqitje të tmerrshme dheu teksa punonte me eskavator në fabrikën e përpunimit të kromit në Qafë-Burrel.
Përpjekjet për gjetjen e tij janë përqendruar në një zonë të vështirë e të paqëndrueshme, ndërsa në ndihmë të kërkimeve janë përfshirë edhe forcat e Forcës së Sigurisë së Kosovës.
Në një apel prekës, babai i të riut, Nerim Beshiri, kërkoi ndërhyrje urgjente nga shteti për mjete të specializuara, duke rrëfyer se prej tre ditësh ai dhe të afërmit po kërkojnë me lopata në mungesë të çdo asistence teknologjike.
View this post on Instagram
“Kërkoj ndihmë nga shteti për gjetjen e trupit të djalit. T’i gjejnë vetëm njërin gisht, ta çoj te familja, se nuk ka gjë më të madhe në botë të humbasësh djalin në mal. I bëj thirrje shtetit, të sjellin aparatura të specializuara, të gjej djalin dhe të di ku të hedh një tufë lule. Ka tre ditë që vij me vëllezërit duke kërkuar me lopatë. Nuk ka asnjë lloj mjeti.
Djali doli në gjashtë të mëngjesit nga shtëpia këtu, hëngri drekën dhe vazhdoi punën me ekskavator, dhe e mori baseni para. Djali kishte pesë vite që punonte, me siguracione, me të gjitha. Nuk kanë si ta gjejnë djalin me lopata, ndaj i kërkoj shtetit ndihmë për mjete të specializuara. Babai, vëllai im tjetër po kërkojnë trupin. Ju lutem, kërkoj ndihmë. Kaq mund të them”,tha ai.
Ndërhyrja me eskavatorë ka nisur në një pjesë të kufizuar të luginës, por deri më tani nuk është bërë e mundur as lokalizimi dhe as nxjerrja e trupit të 29-vjeçarit.
Terreni i rrëshqitur përfshin një sipërfaqe rreth 500 metra të gjatë, 20 metra të gjerë dhe mbi 4 metra të thellë.
Vështirësitë teknike dhe rreziku i rrëshqitjeve të tjera kanë bërë që operacioni të zhvillohet me shumë kujdes, duke përdorur vetëm mjete të kufizuara dhe pajisje për detektimin e trupave nën dhe.
Operacioni i kërkimit mbetet aktiv dhe në përpjekje maksimale, por familja kërkon më shumë mbështetje konkrete dhe teknike për të gjetur djalin e tyre.
