Kuvendi i Kosovës do të mblidhet sot për të 12-ën herë, në përpjekje për të konstituuar organin ligjvënës, proces që ka ngecur për shkak të mungesës së konsensusit për zgjedhjen e kryetarit të Kuvendit.
Lëvizja Vetëvendosje ka propozuar Albulena Haxhiun për këtë post, por kandidatura e saj po refuzohet nga partitë opozitare PDK, LDK dhe AAK të cilat nuk e shohin si një figurë që mund të bashkojë spektrin politik.
Në sfond të kësaj bllokade, Albin Kurti, kreu i VV-së, i ka dërguar një letër kryetarit të Lidhjes Demokratike të Kosovës, Lumir Abdixhiku, duke i propozuar një marrëveshje për bashkëqeverisje. Por përgjigjja e LDK-së ka qenë refuzuese.
Të martën, pas mbledhjes së kryesisë së partisë, Abdixhiku propozoi në një konferencë për shtyp krijimin e një qeverie kalimtare, si zgjidhje për krizën institucionale që ka bllokuar funksionimin e institucioneve.
“Pas katër vitesh bllokadë dhe rreziku për sigurinë kombëtare, një koalicion me Vetëvendosjen nuk është i pranueshëm. Ne propozojmë një qeveri kalimtare me mandat të kufizuar deri në zgjedhjen e presidentit në vitin 2026,” deklaroi Abdixhiku, duke ftuar të gjitha partitë në një proces të ri politik.
Ai nënvizoi se LDK nuk do të ndryshojë qëndrim pavarësisht presioneve apo ftesave të përsëritura, dhe se mbetet e angazhuar për të mos zhgënjyer elektoratin e saj. Për Abdixhikun, një qeveri e përkohshme është rruga e vetme për të dalë nga kriza.
