Policia ka arrestuar drejtuesin teknik të fabrikës së përpunimit të kromit në Qafën e Burrelit, pas ngjarjes së rëndë ku një punëtor 29-vjeçar i zu poshtë nga një masiv rëre dhe minerali.
Në pranga ka rënë A.L., 44 vjeç, banues në Klos, i cili mbante pozicionin e drejtuesit teknik të shoqërisë. Ai akuzohet për shkelje të rregullave të mbrojtjes në punë, një vepër penale që lidhet drejtpërdrejt me sigurinë e punëtorëve.
Sipas njoftimit zyrtar, ngjarja ndodhi një ditë më parë, teksa viktima, A.B., 29 vjeç, po punonte me një fadromë brenda fabrikës dhe u përfshi nga një rrëshqitje e masës minerale.
Trupi i tij ende nuk është gjetur, ndërsa ekipet e kërkim-shpëtimit dhe forcat e Policisë vijojnë operacionin për lokalizimin dhe nxjerrjen e tij.
Hetimet paraprake çuan në arrestimin e drejtuesit teknik, për shkak të dyshimeve se nuk ishin respektuar normat e sigurisë në ambientin e punës.
