Policia ka nisur procedimin penal për shtatë punonjës të sigurisë fizike dhe një drejtues të kompanisë telefonike One Albania, pasi nuk kanë raportuar një sulm të ndodhur në ambientet e kompanisë në dhjetor 2024.
Sipas hetimeve, më 25 dhjetor, rreth orës 02:30, dy persona të maskuar kanë hyrë në zyrat e kompanisë duke dëmtuar drynin e derës së pasme.
Ngjarja është konstatuar nga një punonjës i sigurisë së brendshme, i cili ka raportuar se nuk janë marrë sende dhe nuk ka pasur dëme materiale.
Megjithatë, në vend që të njoftonte autoritetet, ai dyshohet se ka informuar vetëm drejtuesin teknik dhe punonjësit e sigurisë fizike të kontraktuar nga kompania.
Nga hetimet rezultoi se edhe përfaqësues të One Albania ishin në dijeni të incidentit, por nuk e kallëzuan atë në organet kompetente.
Pas veprimeve procedurale, Policia e Tiranës ka referuar materialet në Prokurori dhe ka nisur procedimin penal për veprat “Moskallëzim i krimit” dhe “Veprime që pengojnë zbulimin e së vërtetës” ndaj:
• Dy punonjësve të sigurisë së brendshme të One Albania, G. K., 50 vjeç dhe A. F., 31 vjeç, si dhe ndaj drejtuesit të departamentit të zyrave dhe pasurisë, E. S., 38 vjeç.
• Drejtuesit teknik dhe katër punonjësve të kompanisë private të sigurisë fizike, A. Z., 54 vjeç, G. S., 40 vjeç, K. V., 63 vjeç, M. D., 55 vjeç, dhe I. T., 62 vjeç.
Hetimet vijojnë për identifikimin e autorëve të sulmit dhe për të verifikuar nëse janë përmbushur detyrimet ligjore dhe kontraktuale nga shoqëria private e sigurisë fizike që kishte në ruajtje ambientet e One Albania.
Ngjarja ka rikthyer vëmendjen te problematikat e thella në sektorin e telekomunikacionit, ku dy kompani dominues, One Albania dhe Vodafone, shpesh operojnë si një oligopol.
Ato janë kritikuar për çmimet e larta dhe shërbimet e dobëta që ofrojnë, duke manipuluar tarifat dhe ofertat pa transparencë.
Pavarësisht ankesave të shumta nga qytetarët, këto kompani kanë arritur të rrisin tarifat dhe të mbajnë shërbime të dobëta, duke përfituar nga një treg i monopolizuar dhe pa konkurrencë të vërtetë.
Së fundmi, Autoriteti i Konkurrencës ka nisur hetime për abuzime me çmimet nga One Albania dhe Vodafone, megjithatë, ka dyshime të forta se ky hetim mund të mos çojë në asnjë rezultat konkret, siç ka ndodhur edhe në hetime të tjera të ngjashme që janë mbyllur pa ndonjë rezultat të dukshëm.
Përveç kësaj, hetimet për lidhjet mes kompanive dhe pushtetit lokal kanë nxjerrë në pah një skemë të mundshme korruptive.
Kompania “One” paguan Arbër Veliajn për marketing dhe promovim, ndërkohë që fiton tendera (pa garë) në Bashkinë e Tiranës, e drejtuar nga vëllai i madh i familjes Veliaj, Erioni.
SPAK ka zbuluar se një kompani sigurimi dhe “One Communication” kanë pasur marrëdhënie kontraktuale me “Gogel” në vlerë prej 5 milionë eurosh.
“Nga hetimi rezulton se klienti kryesor i ‘Gogel shpk’ është shoqëria ‘One Albania’, me një total shitjesh prej 551.639.924 lekë të reja”, thuhet në vendimin e gjykatës për caktimin e masës së sigurisë “arrest me burg” për Erion Veliaj.
