Në Gjykatën e Posaçme të Apelit do të vijojë sot, në orën 12:30, shqyrtimi i ankimimit për masën e sigurisë ndaj Erion Veliajt.
Pas seancës të djeshme, e cila zgjati shtatë orë, gjyqtari Engert Pëllumbi vendosi shtyrjen për t’i dhënë kohë palës mbrojtëse të njihet me provat e reja të paraqitura nga prokurorët e SPAK-ut, Altin Dumani dhe Ols Dado.
Gjatë seancës së djeshme, avokati i Veliajt propozoi garanci pasurore në këmbim të ndryshimit të masës së sigurisë.
Një ofertë e ngjashme u paraqit edhe nga avokati i biznesmenit Elman Abule. Edhe tre biznesmenët e tjerë të akuzuar për korrupsion ndaj zyrtarëve, Meriman Palushi, Gentjan Sula dhe Shkëlqim Fusha, kanë apeluar masat e tyre të sigurisë.
Kryebashkiaku i Tiranës u arrestua më 10 shkurt me akuzat për korrupsion dhe pastrim parash, ndërsa më 12 shkurt, pas një seance të gjatë, GJKKO vendosi të lërë në fuqi masën e sigurisë “Arrest në burg”.
