Dy ditë më parë një 51-vjeçar nga Kosova u arrestua në aksin rrugor Elbasan-Peqin. Atij iu sekuestruan 19 pistoleta dhe rezulton se ëhtë pronari i një klubi në Kosovë.
Ylber Ademi është personi i arrestuar me armë dhe municione nga Forcat e Posaçme Operacionale. Sot gjykata vendosi për të masën e sigurisë arrest me burg.
Ai u arrestua pas disa informacioneve se do kryente trafik armësh.
Mësohet se Ademi kishte siguruar 19 pistoleta të kalibrave të ndryshëm nga Serbia dhe i kishte sjellë në vendin tonë për t’i shitur. Përveç armëve, 51-vjeçarit iu zbuluan në automjet municione dhe lëndë plasëse.
Shtetasi kosovar i kishte fshehur në vende të ndryshme në makinë, në bagazh e kroskot. Dyshohet se personi i ndaluar ka kryer ehe më parë trafikim të armëve në vendin tonë.
Hetuesit kanë dyshime të forta se armët dhe municionet do të përfundonin në duart e grupeve kriminale që veprojnë në Elbasan. 51-vjeçari ka thënë në polici se armët i kishte marrë në Serbi.
Në cilësinë e provës materiale u sekuestruan 19 armë zjarri të llojit pistoletë, të markave të ndryshme, 400 fishekë luftarakë, 4 kallëpe lënde eksplozive të llojit TNT, me peshë të përgjithshme 1.6 kg, 3 telefona dhe automjeti që transportonte armët.
Ylber Ademi rezulton se është pronar i një klubi nate në Podujevë. 51-vjeçari dyshohet se është person i përfshirë në botën e krimit, në trafik armësh dhe droge.
