Gjirokastra është tronditur nga ngjarja tragjike që ndodhi pesë ditë më parë, kur Irsa Muçollari, një vajzë e re 17-vjeçare, i dha fund jetës.
Prokuroria e Gjirokastrës ka nisur një hetim të thelluar dhe ka filluar marrjen në pyetje të dhjetëra personave lidhur me faktorët që mund të kenë çuar në këtë akt ekstrem.
Hetimi është bazuar në disa shënime të gjetura në një letër dhe një ditar të ruajtur në telefonin e saj.
Ky hetim është thelluar pas zbulesës së disa elementëve që mund të kenë ndikuar në gjendjen emocionale të saj, duke përfshirë bullizmin dhe izolimin shoqëror.
Sipas hetimeve, janë intervistuar gjithashtu stafi pedagogjik dhe drejtuesit e shkollës “Siri Shapllo”, si dhe përfaqësues të Zyrës Arsimore të Gjirokastrës. Pjesë e hetimit janë gjithashtu familjarët dhe shoqet e vajzës.
Një ditar është zbuluar në telefonin e saj, ku ajo kërkonte të pranohej nga shoqëria.
Irsa, e cila nuk kishte shoqëri dhe qëndronte e mbyllur, kishte një shoqe të ngushtë që ishte transferuar disa muaj më parë në një gjimnaz tjetër të Gjirokastrës.
Ajo mbante një ditar të shkurtër në telefonin e saj, ku shkruante kryesisht në gjuhën angleze. Në ato pak rreshta shprehte shqetësimin për mospranimin në shoqëri, duke shkruar:
“Dua që shoqëria të më pranojë kështu si jam. Ndryshe do të detyrohem të ndërroj shoqëri. Nuk dua të më paragjykojnë për veshjen dhe sjelljen time. Unë jam kjo që jam!”
Irsa e kishte shkruar këtë letër në anglisht dhe e kishte fshehur në kapakun e celularit të saj që mos ta kuptonin prinderit.
Letra që zbulon dhimbjen e thellë të viktimës
Në sendet personale të vajzës, familjarët gjetën një letër të shkruar në anglisht, në të cilën ajo shprehte dhimbjen dhe ndjenjën e izolimit nga shoqëria. Në letër, 17-vjeçarja ngre pyetjen “Pse më bullizojnë mua?”, duke dhënë një sinjal të qartë për mundësinë e bullizmit që mund të ketë ndikuar në vendimin e saj tragjik. Kjo ka shtuar dyshimet për faktorët e jashtëm që mund të kenë ndikuar në jetën e vajzës dhe ka nxitur kërkesa për masa më të forta kundër bullizmit në shkolla.
Në letrën e saj, viktima përshkruante ndjenjat e saj të dhimbjes dhe dëshirës për të përfituar nga shoqëria, duke treguar se nuk ndihej e pranuar dhe kishte vështirësi të krijonte lidhje me bashkëmoshatarët. Për më tepër, ajo shprehte dëshirën për t’u veshur si shoqet e saj dhe për të pasur veshje më të bukura.
Një tjetër faktor që ka rënduar situatën është gjendja e vështirë ekonomike e familjes së vajzës. I ati, pas një aksidenti në punë, kishte mbetur i papunë për vite me radhë, duke përkeqësuar më tej pasiguritë financiare dhe emocionale të familjes. Ky aspekt i jetës së vajzës mund të ketë kontribuar në ndjenjat e pasigurisë dhe trishtimit që ajo ndiente.
