Deputeti Gazment Bardhi është shpallur i pafajshëm nga Gjykata e Posaçme Kundër Korrupsionit dhe Krimit të Organizuar për akuzat e shpifjes dhe fyerjes ndaj ish-drejtorit të Policisë së Shkodrës, Edmond Sula.
Bardhi gjatë një interpelance në Kuvend më 12 shtator 2024, akuzoi Edmond Sulën se ishte emëruar në këtë detyrë nën ndikimin e grupeve kriminale.
Ai theksoi se emërimi i Sulës ishte diktuar nga bandat kriminale të përfshira në përgjimet e aplikacionit SKY ECC, të cilat ishin pjesë e një hetimi të SPAK. Sipas Bardhit, Sula ishte besnik i bandave në Shkodër dhe ishte emëruar për t’i shërbyer interesave të këtyre grupeve.
Në përgjigje të këtyre akuzave, Edmond Sula e paditi Bardhin për shpifje, duke argumentuar se bisedat në aplikacionet SKY ECC dhe EncroChat, për të cilat u referua Bardhi, i përkisnin periudhës 2019-2020, ndërkohë që ai ishte emëruar në krye të Policisë së Shkodrës në tetor 2023.
Për këtë arsye, Sula kërkoi që Bardhi të mbante përgjegjësi ligjore për deklaratat e tij.
Pas shqyrtimit të çështjes, GJKKO vendosi të shpallë të pafajshëm Bardhin dhe të pushojë çështjen. Vendimi u mor nga gjyqtarja Flojera Davishi, duke rrëzuar kërkesat e palës paditëse.
Pas vendimit, avokati i Bardhit, Marash Logu, reagoi duke thënë:
“I them Edi Ramës, mos u fshih, mos keqpërdor vartësit e tu, po hajde vetë në SPAK dhe përballu me faktet e pakundërshtueshme të lidhjes së Policisë së Shtetit dhe politikës me krimin e organizuar. Këtë llogari duhet ta japë Edi Rama dhe duhet ta japë në SPAK.”
