Sali Berisha ka reaguar pas transferimit të kryebashkiakut të pezulluar të Tiranës, Erion Veliaj, në paraburgimin e Durrësit.
Sipas tij, kjo lëvizje ka për qëllim të ushtrojë presion ndaj Veliajt për të mos folur.
Në një prononcim për mediat, Berisha e quajti këtë veprim një “kod mafioz të tmerrshëm” dhe theksoi se e njëjta skemë ishte përdorur më parë me ish-ministrin Lefter Koka.
“E çuan Veliajn në Durrës dhe atje do t’i dërgojnë Pojën për t’i mbyllur gojën. E njëjta gjë ndodhi edhe me Lefter Kokën, të cilin e lanë aty me të njëjtin presion,” tha Berisha.
Ai shtoi se nuk kishte parë reagime nga militantët e Partisë Socialiste për arrestimin e Veliajt, por vetëm nga policët dhe punonjësit e Bashkisë së Tiranës.
“Duket sikur Veliaj ka bërë garë me gruan e Assadit. Megjithatë, qindra artikuj janë përjashtuar nga SPAK,” përfundoi Berisha.
