Kryeministri Edi Rama ka reaguar ndaj akuzave dhe diskutimeve mbi statusin ligjor të kryetarit të Bashkisë së Tiranës, Erion Veliaj, duke theksuar se ai nuk është i pandehur, por vetëm i dyshuar.
“A e dini ju që kryetari i Bashkisë së Tiranës nuk është i pandehur? Pra, vetë prokuroria nuk është e gatshme të kërkojë gjyqin, por ka dyshime të arsyeshme sipas saj, që nuk i ka ato prova,” deklaroi Rama.
Rama theksoi se, sipas prokurorisë, nuk ka prova të mjaftueshme për të kërkuar një gjyq, pavarësisht dyshimeve të arsyeshme.
Kreu i qeverisë gjithashtu theksoi se SPAK nuk do të ekzistonte pa mbështetjen e tij dhe të Partisë Socialiste, duke shtuar se ata që kërkojnë shkrirjen e SPAK janë si “bufi i kënetës”.
Rama vijoi të mbajë qëndrim të fortë, duke kërkuar vazhdimisht prova për akuzën ndaj Veliajt, ndërkohë që nuk sqaroi se si duhet të procedohet për këtë kërkesë, pasi për këtë vendos Gjykata e Posaçme.
Kjo ka lënë të paqartë bazën ligjore apo rregullore për të parë provat, siç kërkon ai.
