Transparensi International ka publikuar së fundmi të dhënat më të fundit mbi korrupsionin në nivel global, duke ofruar një pasqyrë të detajuar mbi nivelin e perceptuar të korrupsionit në sektorin publik të shteteve të ndryshme.
Sa i përket Shqipërisë, vendi ynë renditet i 80-ti nga 180 shtete, duke treguar një përmirësim të ndjeshëm prej 5 pikësh krahasuar me vitin 2023. Indeksi i Perceptimit të Korrupsionit (CPI) është një nga treguesit kryesorë për matjen e korrupsionit në nivel global. Ky indeks vlerëson perceptimin e korrupsionit në sektorin publik të çdo shteti, bazuar në mendimet e ekspertëve dhe biznesmenëve.
Indeksi i korrupsionit është rezultat i një kombinimi të të paktën tre burimeve të të dhënave nga 13 sondazhe dhe vlerësime të ndryshme të korrupsionit, të mbledhura nga institucione të njohura dhe me reputacion ndërkombëtar, si Banka Botërore dhe Forumi Ekonomik Botëror. Ky sistem vlerësimi është i ndarë në një shkallë nga 0 në 100, ku 0 tregon një nivel të lartë korrupsioni dhe 100 tregon një sektor publik të pastër.
Përpilimi i këtij indeksi bazohet në disa aspekte të korrupsionit, përfshirë:
Ryshfeti: Shpërndarja e parave ose përfitimeve për të ndikuar në vendimmarrje.
Devijimi i fondeve publike: Përdorimi i fondeve që janë paraparë për shërbime publike në mënyrë të pasaktë ose të paligjshme.
Keqpërdorimi i funksioneve publike për përfitime private: Zyrtarët që përdorin pozitat e tyre për përfitime personale.
Aftësia e qeverive për të luftuar korrupsionin: Masat dhe mekanizmat që ka një qeveri për të parandaluar dhe hetuar korrupsionin.
Burokracia e tepërt: Procedurat administrative të ndërlikuara që mund të krijojnë mundësi për korrupsion.
Emërimet nepotike: Përdorimi i pozitave për të favorizuar familjarët dhe miqtë në shërbimin civil.
Zbatimi i ligjeve për deklarimin e pasurive: Ligje që kërkojnë nga zyrtarët të deklarojnë pasuritë dhe të shmangin konfliktet e mundshme të interesit.
Mbrojtja e atyre që raportojnë korrupsionin: Rregullore që mbrojnë individët që denoncojnë korrupsionin dhe ryshfetin.
Kapja e shtetit nga interesa të ngushta: Dominimi i grupeve të fuqishme që kontrollojnë shtetin për përfitime private.
Qasja në informacionin publik: Transparenca dhe aksesueshmëria e informacionit që lidhet me aktivitetet e qeverisë dhe politikave publike.
