Gjykata e Apelit të Juridiksionit të Përgjithshëm ka hedhur poshtë kërkesën e avokatit të Mario Përlleshajt për zëvendësimin e masës së sigurimit “arrest në burg” me “arrest shtëpie”.
Avokati kërkoi që Përlleshaj, i akuzuar për vrasjen me thikë të 14-vjeçarit Martin Cani, të lirohej nga burgu dhe të vendosej në “arrest shtëpie”, por kjo kërkesë u refuzua.
Gjykata e Shkallës së Parë të Tiranës kishte vendosur më parë që të mituri të qëndronte në burg, duke vlerësuar se masa e sigurimit të mbetej në fuqi.
Pas ankimit të mbrojtjes, çështja u shqyrtua nga Gjykata e Apelit, e cila, pas shqyrtimit, ka vendosur të miratojë vendimin e Shkallës së Parë, duke lënë të pandryshuar masën e sigurimit “arrest në burg” ndaj të miturit, i akuzuar për vrasje në rrethana cilësuese.
