Prokuroria Themelore në Mitrovicë ka njoftuar se ka ndaluar pesë persona në dy raste të ndryshme, mbi dyshimin për “cenim të përcaktimit të lirë të votuesve”.
Katër prej tyre janë ndaluar në një rast, ndërsa një tjetër në rastin e dytë.
“Prokurorët e Shtetit, të cilët po kujdestarojnë sot, do të veprojnë me urgjencë në secilin rast që mund të paraqitet me qëllim të parandalimit të keqpërdorimeve të mundshme gjatë këtij procesi zgjedhor. Prokurori i Shtetit sërish i fton qytetarët e Republikës së Kosovës, të gjitha subjektet politike, institucionet apo organizatat e ndryshme, që të denoncojnë tek prokuroritë përkatëse, çdo rast, për të cilin kanë dyshime se po keqpërdoret ose manipulohet vota në çfarëdo mënyre dhe nga kushdo qoftë”, ka njoftuar Prokurori i Shtetit.
