50-vjeçari Alfred Dedja u ekzekutua me armë zjarri mbrëmjen e djeshme në një lokal në Ndroq, ndërsa autori i dyshuar, 26-vjeçari Julian Gjoshi, është dorëzuar sot në polici.
Gjoshi ka lidhje familjare me Altin Hajrin, të kërkuarin e drejtësisë, dhe një ditë më parë disa media raportuan se Dedja kishte njohje me Hajrin dhe kishte punuar në hotelin e tij, duke sugjeruar një lidhje me ngjarjen kriminale të vitit 2020, ku u ekzekutua Jan Prenga.
Megjithatë, SPAK ka reaguar, duke hedhur poshtë këto lidhje dhe duke sqaruar se Dedja nuk kishte asnjë lidhje me ngjarjen e vitit 2020 dhe nuk kishte punuar në kompleksin “Golden” të Hajrit. Në komunikatën e SPAK, theksohet se hetimet deri më tani nuk kanë konfirmuar asnjë lidhje të viktimës me rrëmbimin e Jan Prengës dhe se ai nuk ishte përfshirë në grupin që e kryente këtë krim.
Gjithashtu, SPAK ka kërkuar zbatimin e masës së sigurisë ndaj Altin Hajrit, i cili akuzohet për pjesëmarrje në një grup të strukturuar kriminal dhe për rolin e tij në rrëmbimin e Prengës.
