Një punëtor 51-vjeçar shqiptar, Fatmir Isufi, humbi jetën mbrëmjen e së hënës në një aksident tragjik në vendin e punës në Torino.
Ai jetonte në Arcore dhe po punonte në një impiant pastrimi uji në Corso Unità d’Italia kur ndodhi ngjarja fatale.
Isufi u shtyp nga krahu i vinçit, ndërkohë që ishte duke punuar në ndërtimin e një strukture për një rezervuar të ri pompimi.
Në vendngjarje, përveç ekipeve të mjekëve dhe autoambulancave, ndërhynë edhe zjarrfikësit e reparteve Centrale dhe Lingotto, karabinierët e njësisë lëvizëse dhe inspektorët e Spresalit të ASL Torino, që po kryenin hetimin e aksidentit.
Sipas hetimeve të para, krahu i vinçit ka rënë mbi punonjësin gjatë procesit të punës.
Në kantier ka qenë edhe djali i viktimës, i cili ka mbetur i padëmtuar, por ka kaluar një gjendje shoku nga ngjarja e rëndë.
