Komisioni i Mbrojtjes Civile në qarkun e Korçës, nën drejtimin e prefektit Nertil Jole, zhvilloi një analizë të administrimit të Emergjencave Civile verore dhe diskutoi përgatitjen për administrimin e situatave emergjente gjatë dimrit.
Ky takim është pjesë e një seri konsultimesh që Ministri i Mbrojtjes dhe Drejtori i Agjencisë Kombëtare të Mbrojtjes Civile po zhvillojnë në çdo qark të vendit, duke synuar të përmirësojnë mbështetjen e ofruar nga qeveria qendrore dhe të forcojnë kapacitetet e shërbimeve të mbrojtjes civile.
Prefekti Jole ka theksuar rëndësinë e angazhimit maksimal të Njësive të Vetëqeverisjes Vendore dhe përdorimin e fondeve të kushtëzuara për të financuar projekte të ndryshme, si infrastrukturën parandaluese, rikonstruksionin e digave, dhe blerjen e mjeteve të nevojshme për emergjencat civile. Po ashtu, Jole ka bërë të ditur se afati për aplikimet për këto financime është 25 Nëntori.
Në fjalën e tij, Jole ka përmendur edhe problematikat e vitit të kaluar, siç ishin vështirësitë me mirëmbajtjen e akseve kryesore nacionale dhe rrugëve turistike. Sidoqoftë, ai vlerësoi angazhimin më të mirë të strukturave të mbrojtjes civile dhe koordinimin efektiv me bashkitë dhe institucionet shtetërore, që kontribuuan në menaxhimin më të suksesshëm të situatave emergjente.
Në fund, prefekti shprehu besimin se, me angazhimin e të gjitha hallkave dhe institucioneve, situatat emergjente që mund të lindin gjatë dimrit do të administrohen dhe përballohen me sukses.
