Gjykata e Posaçme ka pushuar çështjen penale ndaj deputetit të Partisë Socialiste Agron Çela, pas kërkesës së SPAK.
Çela akuzohej për mashtrim, bazuar në një kallëzim nga një qytetar, i cili pretendonte se deputeti i kishte kërkuar hua prej 15 mijë euro. Pas hetimeve, SPAK konkludoi se nuk kishte vepër penale në këtë rast dhe se konflikti mes Çelës dhe qytetarit ishte zgjidhur.
Agron Çela është përmendur gjithashtu në hetimet lidhur me çështjen CEZ-DIA, ku SPAK ka identifikuar përfitime financiare nga DIA, shoqëria e Kastriot Ismajlajt. Sipas hetimeve, shoqëria “Xhenis” shpk, ku Çela ka qenë ortak, ka përfituar indirekt nga shuma e transferuar prej 16.8 milionë lekësh që DIA i ka dhënë një tjetër shoqërie, “BTT”.
Në atë periudhë, Çela ishte deputet i zgjedhur si përfaqësues i Lëvizjes Socialiste për Integrim.
