Trajneri Silvinjo ka zgjedhur të zhvillojë stërvitjen në “Shtëpinë e Futbollit” dhe jo në “Air Albania”.
Edhe ditën e djeshme, grupi nuk ka qenë i plotë për shkak se Jon Mersinaj dhe Adrian Bajrami u bashkuan më vonë në grumbullim dhe nuk arritën në kohë stërvitjen.
Për të kompensuar mungesat, trajneri ka ftuar pesë futbollistë nga kampionati shqiptar, dy prej të cilëve janë emra të njohur të Superiores si: Marçelino Preka i Partizanit dhe Artan Jazxhi i Teutës. Përkrah tyre ishin edhe Segersio Geci i Vorës, Andri Xhafa i Kastriotit dhe Keslin Shani i Erzenit.
Përveç Mersinaj dhe Bajrami, Mirlind Daku u stërvit vetëm në palestër për shkak të lodhjes nga udhëtimi.
Një mungesë e papritur ishte ajo e Elseid Hysajt, i cili nuk mori pjesë në stërvitje, dhe nuk ka asnjë informacion nga FSHF për shkakun e kësaj mungese.
Për sa i përket formacionit për ndeshjen ndaj Çekisë, Silvinjo pritet të mbajë të njëjtin formacion fitues.
Strakosha do të jetë në portë, ndërsa mbrojtja do të përbëhet nga Ivan Balliu dhe qendra me Ardian Ismajlin dhe Arlind Ajetin. Në krahun e majtë do të luajë Mario Mitaj, ndërsa mesfusha do të drejtohet nga Ramadani, Asllani dhe Laçi. Në krahët e sulmit, Asani dhe Bajrami pritet të jenë të gatshëm. Me pezullimin e Dakut, Indrit Tuci pritet të nisë nga minuta e parë.
