Një 23-vjeçar shqiptar u arratis dy ditë më parë nga qelia e tij, në komisariatin e Monzas të Italisë. Ai ka lënë me “gojë hapur” autoritetet italiane, pasi largimi nga qelia ka qenë pothuajse i pamundur për të ndodhur.
Arratisja e tij ka qenë spektakolare, pasi ka dalë nga hapësira nëpërmjet hekurave, ka hapur një dritare dhe ka dalë në ambientet e jashtme me shpejtësi.
I riu ishte arrestuar për një grabitje në një apartament, ndërsa u arratis pak orë pasi ishte shoqëruar në stacionin e Policisë.
I riu u zbulua nga një patrullë e policisë, falë një sistemi alarmi që kishte në apartament dhe që ishte aktivizuar. Pasi u arrestua nga karabinierët, i riu ishte munduar të fshihte bizhuteritë që kishte vjedhur në banesë.
I riu shqiptar u shoqërua në ambientet e komisariatit të policisë, ku u vendos në një dhomë sigurie ku qëndrojnë personat në pritje të vendimit të Gjykatës.
Në mbrëmje vonë, duke përfituar nga errësira dhe lënia hapur e një dritareje, shqiptari arriti të dilte nga dhoma e sigurisë.
Falë peshës së tij të lehtë, por dhe shkathtësisë fizike, ai u hodh nga ballkoni duke ia mbathur nga komisariati. Policia italiane po punon për kapjen e 23-vjeçarit.
