Agjencia e Administrimit të Pasurive të Sekuestruara dhe Konfiskuara (AAPSK) ka marrë në administrim 102 kontenierë me lëndë të rrezikshme, të cilët u rikthyen në Shqipëri me anijen “Moliva”.
Ky proces është realizuar në përputhje me një plan të detajuar masash, sipas urdhrit të Prokurorisë së Durrësit, që ka udhëzuar zbarkimin dhe ruajtjen e kontenierëve në një zonë të sigurt, me respektimin e të gjitha kushteve të sigurisë fizike, mjedisore dhe shëndetësore.
Operacioni është mbështetur nga një grup institucionesh të ndryshme, përfshirë Drejtorinë Vendore të Policisë Durrës, Autoritetin Portual Durrës, Doganën Durrës, Kapitenerinë e Portit, Drejtorinë e Hetimit Doganor dhe Prokurorinë e Durrësit.
Pas shkarkimit të kontenierëve, ata janë transportuar në zonën e Porto Romanos, ku do të ruhen dhe administrohen nga AAPSK me monitorim të vazhdueshëm.
Në përputhje me procedurat e sigurisë, kontenierët janë skanuar, kontrolluar dhe verifikuar për të siguruar që janë të paprekur dhe në përputhje me standardet ndërkombëtare të ruajtjes së lëndëve të rrezikshme.
AAPSK thekson se gjithçka është dokumentuar në detaje për të siguruar transparencë dhe siguri gjatë këtij operacioni.
