Ngjarja e bujshme e Shkodrës, sipas burimeve nga grupi hetimor dyshohet të ketë zgjatur vetëm 70 sekonda, ku autorët kanë zbrazur breshërinë me armë nga një distancë rreth 150 metra.
Si pasojë e të shtënave me armë, makina Benz me të cilin Lici e Bushati po udhëtonin humbi kontrollin dhe u përplas me një motor, me të cilin po udhëtonte çifti i bashkëshortëve Bashkim dhe Flutura Basha.
Atentati pak metra larg shtëpisë së tyre ndodhi kur ata po ktheheshin nga puna. Bashkimi punon si marangoz, ndërsa bashkëshortja, si nënë e 3 fëmijëve e ndihmonte me punët që kishte.
Familjarët kanë çelur dyert e mortit për 56-vjeçaren që lë jetimë 3 fëmijë dhe bashkëshortin në luftë me jetën.
Indiferenca e Drejtorit të Policisë Shkodër, Edmond Sula ka ngritur pikëpyetje të mëdha për lidhjet e tij me bandat kriminale.
Grupi hetimor i Policisë së Shkodrës dhe Policisë Kriminale ka dyshime se autorët janë vrasës me pagesë nga Mali i Zi, në moshë të re. Makina e viktimave rezulton të ketë hyrë në vendin tonë po ashtu nga Mali i Zi në ditët e fundit dhe ka bërë lëvizje në afërsi të zonës së Dobraçit disa herë.
Për ngjarjen reagoi edhe gazetarja Klodiana Lala, e cila u shpreh se personat në fjalë qarkullonin me automjet me targa të huaja dhe të pajisur me armë, ndërkohë që askush nuk i kontrollonte.
“Kjo ishte një ngjarje që do të përvëlojë Shkodrën. Hamza Lici ishte duke udhëtuar me Arlind Bushatin, me të cilin ishin lidhur shumë kohët e fundit. Familja Bushati është një familje me tradita, një ndër më të njohurat në Shkodër, që nuk kanë pasur probleme. Arlind Bushati ishte i lidhur fillimisht me Astmer Bilalin, më pas ishte hedhur në krahun tjetër, te Licët. Duhet një reagim i shpejtë, Arlind Bushati duhej të ishte marrë në mbrojtje, pasi 3 javë më parë kishte denoncuar se ishte kërcënuar, se ishte i rrezikuar për jetën. Si ka mundësi që ata lëviznin me një automjet me targa të huaja, që kishin edhe armë dhe askush nuk i kontrollonte? Si ka mundësi që nuk u mor në mbrojtje Arlind Bushati? Kjo situatë më tremb”, -tha Lala.
Dyshohet se tre persona ishin të përfshirë në ngjarje: dy qitës dhe një shofer, të cilët përdorën një automjet tip “Range Rover”, i cili pas atentatit u gjet i djegur në fshatin Golem. Brenda këtij automjeti u gjetën dy armë zjarri.
Në automjetin e Hamza Licit u gjetën gjithashtu tri armë zjarri, ku dyshohet se Arlind Bushati kishte tentuar të kundërpërgjigjej ndaj sulmuesve. Kjo pasi disa gëzhoja të gjetura në vendngjarje përkojnë me armën e gjetur në mjetin e drejtuar nga Lici.
Motivi i atentatit dyshohet të jetë hakmarrja, me një histori konflikti mes dy fiseve, Bajri dhe Lici, që ka vazhduar për vite. Para disa ditësh, Arlind Bushati ishte kërcënuar me armë nga dy persona në një motoçikletë, afër banesës së tij.
