Dy qytetarë Ardit Hoxha dhe Fatmir Sadiku, 28 dhe 29 vjeç banues në fshatin Vidhisht dhe në Patos janë arrestuar nga Policia e Fierit sepse mashtronin qytetarët duke tërhequr kredi në emër të tyre. Ata u merrnin qytetarëve, nëpërmjet mashtrimit, kartat e identitetit dhe i përdornin ato për të aplikuar për kredi.
Burime policore thanë se të dyshuarit u luteshin qytetarëve të ndryshëm që t’u jepnin kartën e identitetit me pretendimin se duhet të tërhiqnin para që u kishin dërguar të afërmit e tyre nga jashtë vendit, me pretendimin se kishin harruar në shtëpi kartën e tyre. Pasi bënin fotokopjimin e kartave në fjalë, dy të rinjtë më tej aplikonin për kredi në bankat e nivelit të dytë. Pasi lajmëroheshin nga banka për të paguar kreditë, të habitur qytetarët i janë drejtuar Policisë së Fierit me denoncim. Në cilësinë e provës materiale u sekuestruan 3 celularë, një shumë parash dhe disa fatura. Policia sqaroi më tej se po vijon puna hetimore për të dokumentuar edhe raste të tjera të mashtrimit që mund të kenë kryer këta shtetas.
Sektori për Hetimin e Krimeve Ekonomiko-Financiare, njoftoi sot (2 Tetor) se finalizoi operacionin e koduar “Kredia”.
