Federata Shqiptare e Futbollit (FSHF) është gjobitur përsëri nga Komisioni i Etikës dhe Disiplinës në UEFA, këtë herë me një shumë prej 86.500 euro, për incidentet e ndodhura gjatë ndeshjes kundër Spanjës në raundin e tretë të Kampionatit Europian “Gjermani 2024”. Ndeshja u zhvillua në stadiumin e Dusseldorfit të hënën mbrëma.
Ky penalitet është rezultat i sjelljeve të papërshtatshme të disa tifozëve shqiptarë, të cilët hodhën objekte në fushë, transmetuan mesazhe të pahijshme, ndezën flakadanë dhe ndërprenë ndeshjen duke hyrë në fushë. Për këto veprime, UEFA ka vendosur një sërë gjobash:
- 8.500 euro për ndezjen e flakadanëve.
- 25.000 euro për mesazhet e papërshtatshme.
- 45.000 euro për hedhjen e sendeve në fushë.
- 8.000 euro për hyrjen e tifozëve në fushë.
Kjo është hera e tretë që FSHF gjobitet gjatë këtij kampionati, pas ndëshkimeve të mëparshme për sjellje të ngjashme të tifozëve në ndeshjet kundër Italisë (37.375 euro) dhe Kroacisë (47.500 euro).
