Në një fjalim të mbajtur lidhur me miratimin e komisionit anti-korrupsion nga Kuvendi me votat e mazhorancës, Kryeministri Edi Rama ironizoi opozitën për mospjesëmarrjen e saj në këtë nismë. Rama u shpreh se opozita duhet të ishte më e interesuara për të marrë pjesë në këtë tryezë, duke e cilësuar këtë si një mundësi për t’u përgatitur për të ardhmen.
“Që të mendosh seriozisht se do të vish në pushtet vitin tjetër, duhet të jesh më i interesuari që të vish në këtë tryezë. Të gjitha këto do t’i kesh ti për t’u marrë, qoftë edhe si një kurs parashkollor, kjo mund të vlejë për t’u përgatitur, që në momentin kur të marrësh pushtetin, të jesh gati,” tha Rama.
Ai shtoi gjithashtu se nuk beson që ndonjëri nga ata që pretendojnë se do të marrin pushtetin vitin tjetër e besojnë vetë këtë gjë. “Po sigurisht që, gjasat janë që askush nga ata që thonë se do të marrim pushtetin vitin tjetër, nuk e besojnë as vetë që do të marrin pushtetin vitin tjetër,” përfundoi Kryeministri.
