Mbretëria e Bashkuar është “tronditur nga gjakderdhja” në Rripin e Gazës dhe kjo luftë “duhet të përfundojë”, tha të shtunën, kryeministri britanik Rishi Sunak, me rastin e plotësimit të gjashtë muajve nga shpërthimi i luftës midis Izraelit dhe Hamasit.
“Gjashtë muaj kanë kaluar nga sulmi terrorist i 7 tetorit, më i tmerrshmi në historinë e Izraelit”, tha kryeministri britanik në një deklaratë.
Sulmi i nisur nga militantët e Hamasit më 7 tetor në jug të Izraelit vrau 1,170 njerëz, shumica prej tyre civilë, sipas një numërimi të AFP-së bazuar në shifrat zyrtare nga autoritetet izraelite. Më shumë se 250 njerëz u rrëmbyen dhe u dërguan në Rripin e Gazës. Vlerësohet se më shumë se 30 prej tyre nuk jetojnë më, ndërsa gati 100 janë ende peng.
Si rezultat i operacioneve ushtarake izraelite në Rripin e Gazës, të cilat vazhdojnë pa pushim, sipas Hamasit janë vrarë më shumë se 33,000 palestinezë.
“Ne vazhdojmë të mbështesim të drejtën e Izraelit për të eliminuar kërcënimin e terroristëve të Hamasit dhe për të mbrojtur sigurinë e tij”, tha Rishi Sunak.
“Sidoqoftë, e gjithë Mbretëria e Bashkuar është e tronditur nga gjakderdhja dhe e tronditur nga vrasja e heronjve të guximshëm britanikë që u sollën ushqim atyre në nevojë”, nënvizoi kryeministri britanik.
Shtatë punëtorë në organizatën humanitare World Central Kitchen (WCK), përfshirë tre britanikë, u vranë të hënën në Rripin e Gazës nga një dron izraelit.
“Ky konflikt i tmerrshëm duhet të përfundojë. Pengjet duhet të lirohen. Ndihma humanitare duhet të arrijë në Rripin e Gazës”, theksoi Sunak.
