Prokuroria e Posaçme ka lëshuar 15 urdhërarreste në kuadër të hetimeve për inceneratorin e Tiranës, duke përfshirë dy zyrtarë të Bashkisë së Tiranës, Taulant Tushën dhe Namik Simixhiun. SPAK ka shpallur kërkim ndërkombëtar për biznesmenët Klodian Zoto dhe Mirel Mërtiri, të lidhur edhe me inceneratorët e Elbasanit dhe të Fierit.
Rëndohen akuzat ndaj ish-ministrit të Mjedisit Lefter Kokës dhe ish-sekretarit të Përgjithshëm të Ministrisë së Mjedisit Alqi Bllakos, të dënuar për korrupsionin në inceneratorin e Fierit. Gjykata e Posaçme ka vendosur masat e arrestit në burg për disa prej të arrestuarve, përfshirë Lefter Kokën, Alqi Bllakon, Mirel Mërtirin, Klodian Zoton, etj. Ndërkohë, masa e “Arrestit në shtëpi” është vendosur për disa të tjerë pjesëmarrës në këtë rast.
Hetimet kanë filluar në kuadër të procedimit penal për veprat penale të “Mashtrim me pasoja të rënda,” “Shpërdorim i detyrës,” “Korrupsion pasiv i funksionarëve të lartë shtetërorë ose të zgjedhurve vendorë” dhe “Pastrimi i produkteve të veprës penale apo i veprimtarisë kriminale.” Gjykata ka firmosur sekuestrën e inceneratorit të Tiranës më 1 gusht.
