Kryetari i Bashkisë Tiranë, Erion Veliaj, rrjep para edhe nga fondet për kafshët endacake. Nuk ka rëndësi se qentë dhe macet popullojnë koshat e plehrave, Lali Eri krijon një “realitet” të ri me kafshët që janë vendosur në “Strehëzën” e ngritur nga bashkia.
Erion Veliaj shpenzoi miliona lekë në maj të këtij viti për një qendër për strehimin e kafshëve endacake. Në një dalje për mediat për “prerje shiriti” Lali Eri tha se aty do të mbahen 1000 qen, të cilët do ushqehen nga kjo strehëz dhe do të marrin edhe trajnime veterinare.
Maj 2023, Veliaj prezantoi Strehëzën Veterinare
Tashmë ka nisur tenderin për ushqimin e banorëve të strehëzës, që po e përdor për të çuar fondet tek miqtë e tij biznesmenë. Më datë 29 gusht 2023, Veliaj ka autorizuar tenderin me objekt “Blerje materiale dhe ushqim për nevoja të Strehëzës Veterinare”, i cili është një abuzim nga fillimi në fund. Më poshtë do të rendisim disa fakte që ngrenë dyshime nëse këto para do të shkojnë vërtetë për të blerë ushqimet për qentë.
Së pari, kontrata është nënshkruar në kundërshtim me ligjin mbi prokurimet. Për riskun e korrupsionit që kërcënon fondin, monitoruesi Open Data e ka vlerësuar me “Red Flag”.
Gara për tenderin është shpallur në 4 gusht 2023 dhe është paraqitur vetëm një ofertë, nga bashkimi i operatorëve “M E T A N I” & MILIFAR”.
Më datë 21 gusht 2023 është mbyllur afati i ofertave dhe pa humbur kohë, Veliaj ka shpallur fituese kompaninë e vetme të paraqitur. Pra, nuk ka pasur konkurrencë, por një kontratë dhuratë.
“M E T A N I” sh.p.k. & “MILIFAR” sh.p.k. janë dy komani që shpesh bashkëpunojnë për të marrë pjesë në tenderë, sepse në fakt janë në pronësi të të njëjtit biznesmen, Albert Metani.
Me këto dy emra Metani ka përfituar shpesh fondet e prokuruara nga Policia e Shtetit për ushqimin e qenve. Po ashtu ka marrë fonde nga Bashkia Tiranë, ku Lali Eri i paguan tendera për t’i vrarë mizat dhe mushkonjat që e bezdisin në zyrë
Diciturë: Pronari i kompanisë fituese të tenderit Albert Metani
Qentë në strehëz po ngordhin
Një muaj më parë Gijotina.com tregoi se gjendja në strehëzën e qenëve është shumë më ndryshe nga se e tregon Veliaj, pasi kafshët atje po ngordhin për ujë dhe ushqim. Animal Rescue Albania ka publikuar një video në rrjetin social Fcebook, ku duket se si qentë vuajnë nga uria dhe mungesa e ujit, ndërsa për trajtime veterinare as që bëhet fjalë.
Foto nga qendra, 29 korrik 2023
“Kjo është gjendja katastrofike në të cilët mbahen qentë në strehën e Bashkisë së Tiranë. Atje ku tashmë kasapët veteriner të Bashkisë kanë marrë licencë për të vazhduar për të vrarë qentë e kryeqytetit.
Më parë e bënin fshehtas duke i ngulur gjilpëra me acid në zemër tani e bëjnë duke i lënë të paushqyer e pa kujdes mjekësor qentë e gjorë që vdesin nëpër kafazë të mbuluar nga feçet e tyre e mizat që i hanë të gjallë”, shkruhet në postimin e organizatës.
Deri më sot nuk ka patur asnjë reagim nga Bashkia Tiranë, po tani është kujtuar të blejë ushqim! Ende nuk dihet, nëse vërtetë do të realizohet ky plan, pasi tenderi i ushqimit ka nisur me korrupsion dhe dihet synimi i Lali Erit që bën gjithçka për të fituar para!/ GIJOTINA
