Kryeministri Rama e ka kontaktuar vetë personalisht gazetarin grek Pavlos Papadoupolos, i cili pak ditë më parë shkroi në të përditshmen ‘Kathimerini’ një artikull kritikues për kryeministrin shqiptar për çështjen Beleri.
Rama i kërkoi atij që të kishte mundësi të fliste edhe ai me argumentet e tija dhe kjo u pranua me kënaqësi nga gazetari grek.
Ndërkohë që lidhur me këtë lëvizje të kryeministrit Rama ka reaguar gazetari Andi Bushati , i cili e konsideron gjithë këtë një shfaqje. Sipas tij Edi Rama këto sjellje që mund të habisin një gazetar grek, në kohën kur ishte kryebashkiak i bënte me pronarët, reporterët, kameramanët madje dhe shoferët. Sepse sipas tij e gjithë qasja e tij bazohet në parimin: Dora që nuk kafshohet dot, puthet.
“Natyrisht që një gazetar grek mund të habitet kur i shkruan një kryeministër që s’e ka takuar kurrë. Por, për koleget e tij shqiptarë, që e kanë parë po të njëjtin, që kur ishte kryebashkiak, i çonte SMS jo vetëm pronarëve, por dhe reporterëve, kameramanëve, madje dhe shoferëve të grupit të xhirimit, kjo nuk përbën asnjë çudi. Sepse si atëherë brenda dhe tani jashtë kufijve, parimi është i njëjtë: dora që s’kafshohet dot, puthet,” shkruan Bushati.
