Pas vendimit që mori gjykata e Elbasanit për lirimin nga qelia tëi sh Ministrit të Brendshëm, Saimir Tahiri, ka reaguar Sali Berisha. Berisha tha se ky është një urdhër i kryeministrit Edi Rama. Sipas Berishës, Tahiri e paralajmëroi atë botërisht dhe arriti të mposhtë Edi Ramën.
“Saimir Tahiri u lirua me urdhër të Edi Ramës me ultimatumin që i çoi se është dita e durimit, përndryshe do zbërthej të gjitha lidhjet e Olsit dhe Edit me bandat që nga Meksika deri në Afrikë të Jugut. Kështu që është një urdhër direkt i Edi Ramës.
Saimir Tahiri ia dha këtë ultimatum botërisht. I keni parasysh deklaratat e tij. Më në fund ai arriti ta mposhtë Edi Ramën, i cili tani është i ngërthyer në aferën McGonigal.
Po bën lobimin më të fuqishëm, por nuk do të shpëtojë dot me gjithë angazhimin e Sorosit dhe miqve të tij.
Unë kam bindjen se drejtësia amerikane do t’i tregojë vendin këtij korruptori të McGonigal”, është shprehur Berisha.
Tahirit i takon të kryejë 1 vit 7 muaj e 11 ditë në shtëpi si pjesë të mbetur të dënimit. Sipas avokatit të tij, Tahiri plotësonte kushte të dënimit alternativ. Ka qenë një ekspertizë mjekësore e paraqitur nga avokatët mbrojtës të cilët kanë favorizuar Saimir Tahirin në vendimin që dënimin e mbetur të mos e vuajë më në qeli. Pjesën e mbetur të dënimit, prej gati 1 vit burg, Saimir Tahniri do ta kryejë në shtëpi.
