Pas humbjes së thellë të kandidatit “ Bashkë Fitojmë”, të Vorës me rreth 73% nuk kanë munguar akuzat për ndaj PS-së për manipulim zgjedhjesh.
Me anë të një postimi në rrjete sociale, Indrit Hoxha shkruan se në kutitë e votimit për zgjedhjet e këtij viti ka një ngjashmëri të frikshme me zgjedhjet e pjesshme të 6 Marsit të vitit të kaluar ku çdo kuti ka të njëjtin numër votash.
Sipas tij, kjo nuk mund të jetë e rastësishme, teksa ngrenë dyshimet për manipulime të mëdha.
Kandidati i “Bashkë Fitojmë”, bën me dije gjithashtu se po përgatisin çdo të dhënë për të ankimuar rezultatin e zgjedhjeve për kryetar bashkie në Vorë.
Më tej, Hoxha ka falënderuar bashkëpunëtorët dhe qytetarët që e kanë mbështetur në këto zgjedhje, që sipas tij nuk kanë qenë të lehta, pasi përballë kanë pasur bandat dhe grupet kriminale.
“Rezultati i Vorës në zgjedhjet lokale të 2023 ka një koincidencë të frikshme me rezultatin e 6 marsit të vitit 2022. Çdo kuti votimi ka të njëjtin numër votash, njësoj si në 6 mars. Kjo koincidencë nuk mund të jetë kurrsesi një rastësi. Dyshimet e manipulimit janë të mëdha”, shkruan Hoxha.
Theksojmë se mbi 3.6 milionë qytetarë kishin të drejtë vote, për të zgjedhur 61 kandidatë për kryebashkiakë.
