Në Vlorë është mbyllur procesi i numërimit të Votave dhe sipas një rezultati të thellë, do të drejtohet nga Partia Socialiste në 4 vitet e ardhshme.
Mbyllet procesi i numërimit në Vlorë ku PS ka fituar me një rezultat të thellë.
Ermal Dredha nga PS ka marrë 28243 vota, ndërsa Hysni Sharra nga “Bashkë Fitojmë” 11787 vota. Ndërkohë që të pavlefshme kanë rezultuar 1358 vota.
Nga rezultati kandidati i majtë ka fituar me mbi 16.500 vota kundrejt Sharrës, i dalë nga primaret e Rithemelimt. Numërimi deri tani ka përfunduar në 19 Bashki, pjesa dërrmuese e të cilave janë fituar nga socialistët në pushtet.
Është fjala për Librazhin, Cërrikun, Peqinin, Klosin, Kolonjën, Delvinën, Selenicën, Pustecin, Pukën, Tropojën, Hasin, Dropullin, Roskovecin, Memaliajn, Këlcyrën e Libohovën, krahas Kamzës, Elbasanit e Vorës tre bashkitë ku fituesit u mësuan që mbrëmë çka u mundësua falë votimit e numërimit elektronik.
Theksojmë se mbi 3.6 milionë qytetarë kishin të drejtë vote, për të zgjedhur 61 kandidatë për kryebashkiakë. Në 61 bashki të vendit ishin të hapura 5213 qendra votimi. Mbi 500 qendra votimi shfaqën probleme teknike me identifikimin biometrik, duke shkaktuar vonesa në votime. Për herë të parë në Kamëz, Vorë dhe Elbasan pati votim dhe numërim elektronik dhe në të treja këto bashki, ku fituese rezultoi Partia Socialiste.
