Ditën e sotme një sërë lëvizjesh janë kryer në Policinë e Shtetit.
Me firmë të drejtorit të përgjithshëm të Policisë së Shtetit Muhamet Rrumbullaku, Ardian Çipa nga drejtor i policisë Elbasan shkon drejtor qarku në Policinë Gjirokastër.
Në fakt kjo lëvizje duket e papritur në një kohë kur policia e Elbasanit ka pasur një performancë pozitive në drejtimin e Ardjan Çipës. Në krye të policisë Elbasan u emërua zëvendësdrejtori Ilir Proda. Bledar Çeliku pas dorëzimit të detyrës në Gjirokastër u emërua në Drejtorinë e Përgjithshme të Policisë.
Kujtojmë që në fund të muajit shkurt, drejtori i Përgjithëm i Policisë së Shtetit, Muhamet Rrumbullaku dha disa porosi për drejtuesit e qarqeve lidhur me fenomenin e “shtëpive të barit”. Porositë konsistonin me qëllim parandalimin e kultivimit të bimëve narkotike. Rrumbullaku ka bërë thirrje për të kontrolluar ambientet e mbyllura të dyshuara për kultivim të kanabisit, për kontroll të përjavshëm të terrenit, për kontrolle në bazë të analizës së riskut në pikat e kalimit kufitar dhe për patrullime të shtuara në kufirin tokësor dhe në atë detar.
Më herët 7 punonjës të Policisë së Beratit dhe Dimalit janë përjashtuar nga radhët e Policisë së Shtetit, pas zbulimit të serës me kanabis në fshatin Drenovicë. Përjashtimi nga policia e shtetit të këtyre efektivëve, erdhi si pasojë e mosevidentimit të kanabisit të kultivuar në serë, nga strukturat vendore të Policisë së Beratit, pasi një gjë e tillë është tërësisht e patolerueshme dhe e ndëshkueshme. Po ashtu është shkarkuar Drejtori i Policisë Berat Edmond Tarkaj si dhe është ulur në gradë për 6 muaj. Vendimi ka ardhur nga drejtori i Përgjithshëm i Policisë së Shtetit Muhamet Rrumbullaku pas zbulimit të serës me kanabis në Dimal (Ura Vajgurore).
