Mijëra studentë u mblodhën paraditen e sotme para Parlamentit, duke bërë thirrje që kryeministri Edi Rama dhe ministrja e Arsimit, Lindita Nikolla, të dëgjojnë thirrjet e tyre për plotësimin e tetë kërkesave.
Lidhur me protestën e tyre të sotme reagoi edhe Presidenti Ilir Meta. Kreu i shtetit ktheu për rishqyrtim në Kuvend ligjin për buxhetin e 2019-s.
Kjo lëvizje e Metës vjen si një mundësi për plotësimit të kërkesave që kanë studentët dhe që lidhen direkt me buxhetin adresuar për ta.
“Presidenti i Republikës, ka besimin e plotë se Kuvendi i Shqipërisë do të reflektojë një bashkëpunim gjithëpërfshirës me qëllim plotësimin e kërkesave të studentëve dhe interesit publik”, thuhet në njoftimin e Presidentit.
Deklarata e Presidentit:
Presidenti i Republikës Ilir Meta, duke ndjekur me shumë vëmendje situatën politike më të fundit në vend, si dhe duke vlerësuar konsensusin e gjerë publik mbi kërkesat e studentëve, të cilat janë konsideruar nga të gjithë aktorët politikë si, të drejta, legjitime dhe të realizueshme, duke synuar interesin më të mirë në përmbushjen e objektivave sociale të parashikuara në nenin 59 të Kushtetutës, si dhe në garantimin e stabilitetit në vend, me dekretin nr. 10997, datë 13.12.2018 ka vendosur “Kthimin për rishqyrtim në Kuvend të ligjit nr.99/2018 “Për buxhetin e vitit 2019”, me qëllim rishqyrtimin e tij.
Presidenti i Republikës, ka besimin e plotë se Kuvendi i Shqipërisë do të reflektojë një bashkëpunim gjithëpërfshirës me qëllim plotësimin e kërkesave të studentëve dhe interesit publik.
